Մեծ էկրաններին է հայտնվել Էլթոն Ջոնի մասին «Rocketman» կենսագրական ֆիլմը: Երգիչն, ավելի վաղ, պատմել էր, թե բայոպիկից որ տեսարանները հանելուն է նա կտրականապես դեմ, իսկ այսօր հայտնի է դարձել, որ «Rocketman»-ը ռուսական վարձույթում խիստ գրաքննության է ենթարկվել:
Ըստ լրատվամիջոցների, Ռուսաստանում «Rocketman» ֆիլմից «կտրել են» թմրանյութերի և տղամարդկանց, մասնավորապես Էլթոն Ջոնի և նրա մենեջեր Ջոն Ռայդի միջև ինտիմ հարաբերությունների տեսարանները:
Էլթոն Ջոնը խստորեն դատապարտել է ռուսական վարձույթում «Rocketman» ֆիլմը գրաքննելու որոշումը: Համապատասխան հաղորդագրությունը նա տեղադրել է Twitter-ի իր էջում:
«Մենք կտրականապես մերժում ենք ռուսական շուկայի համար «Rocketman»-ի գրաքննության մասին որոշումը: Հանդիսատեսը զրկվել է ֆիլմն ամբողջությամբ դիտելու իրավունքից»,- գրել է երգիչը:
Ավելի վաղ Էլթոն Ջոնն ասել էր, որ ֆիլմը ստեղծողները ցանկացել են մեղմել այն՝ 13+ վարկանիշին համապատասխանեցնելու համար, սակայն երգիչը դեմ է դրան, քանի որ նրա կյանքը իրականում չի համապատասխանում նման վարկանիշի:
«Ես 13+ վարկանիշին համապատասխան կյանք չեմ վարել: Ես չէի ուզում, որ նկարը լցված լինի թմրադեղերով և սեքսով, բայց բոլորը գիտեն, որ 70-ական և 80-ականների ընթացքում այդ երկուսն էլ շատ են եղել իմ կյանքում»,- հայտարարել է Էլթոն Ջոնը:
— Elton John (@eltonofficial) May 31, 2019
