Պարզվում է, որ մասոնների համահայկական համաժողով Հայաստանում տեղի է ունենում առնվազն տարին 2 անգամ, իսկ Հայաստանից դուրս՝ ամեն ամիս։
Այս մասին մեզ հետ զրույցում հայտնում է հուլիսի 4-11-ը Armenia Marriot հյուրանոցում տեղի ունեցող աշխարհասփյուռ հայ մասոնականների համաժողովի մասնակից, ֆրանսահայ Վարուժան Գրիգորյանը:
Այս համաժողովի նպատակի մասին տեղեկություններով, սակայն, պարոն Գրիգորյանը հրաժարվեց կիսվել՝ ասելով, որ դեռ հանդիպումները չեն ավարտվել, և հրապարակելու ենթակա ոչինչ չկա։ Ի դեպ, համաժողովին մասնակցում են հիմնականում Ֆրանսիայից ժամանած հյուրեր։ Համաժողովը, փաստորեն, խիստ գաղտնի է անցկացվում։ Մասնակիցների ժողովի սենյակը մտնել խստիվ արգելված է, նույնիսկ սուրճ կամ սնունդ տանել չի թույլատրվում առավոտյան 10։00-ից հետո։
Մենք սրահի մուտքի մոտ զրույց ունեցանք Հայաստան ժամանած բազում հյուրերի հետ, այդ թվում՝ նաև Grand Orient De France օթյակի Մեծ վարպետ պարոն Գի Արսիզեի հետ։ Նրանք բոլորը հրաժարվեցին խոսել համաժողովից՝ ասելով «C’est privée» (ֆրանսերեն՝ սա գաղտնի է)։
Համաժողովի ժամանակացույցից տեղյակ չեն նաև հյուրանոցի աշխատակիցները։ Նրանց փոխանցմամբ՝ կոստյումով և համապատասխան կրծքանշանով մարդիկ սրահ գալիս և գնում են առավոտից մինչ ուշ երեկո։
