Կանանց առողջության պահպանման միամսյակի շրջանակներում բաց դռների օրեր կկազմակերպվեն ինչպես պոլիկլինիկաներում, այնպես էլ առաջատար կլինիկաներում: Այսօր տեղի ունեցած մամուլի ասուլիսի ժամանակ այս մասին ասաց առողջապահության նախարարության Մոր և մանկան առողջության պահպանման վարչության պետ Կարինե Սարիբեկյանը:
Նրա խոսքով՝ թեկուզև առողջության պահպանման առաջնային օղակներում բուժծառայություններն անվճար են, այդուամենայնիվ, կանանց միայն տասը-տասնհինգ տոկոսն է այցելում բժիշկներին:
«Միամսյակի շրջանակներում հետազոտություններ և հետագա բուժում ապահովելու ենք մի շարք հիվանդությունների մասով՝ սրտաբանական գինեկոլոգիական, ակնաբուժական և այլն: Բացառություն են կազմելու նորագույն տեխնոլոգիաներով բուժում պահանջող բարդ հիվանդությունները»,- նշեց Կարինե Սարիբեկյանը՝ հավելելով, որ բուժծառայությունները փոխհատուցվելու են պետական բյուջեով:
Կուտակումներից, դժգոհություններից խուսափելու համար պաշտոնյան կանանց խորհուրդ տվեց չմոռանալ, որ առողջական այս կամ այն խնդրով նախևառաջ պետք է դիմել պոլիկլինիկաներ և նոր միայն բժշկի ուղեգրով՝ մասնագիտացված կենտրոններ: «Հատկանշական է, որ միամսյակին կարող են մասնակցել ինչպես երևանաբնակ, այնպես էլ մարզերի կանայք»,- ասաց Կարինե Սարիբեկյանը՝ միաժամանակ դժվարանալով կոնկրետ թիվ մատնանշել՝ որքան գումար է պետբյուջեից հատկացվել միամսյակի իրականացման նպատակով:
Ասուլիսի մյուս բանախոս, Հայ-ամերիկյան առողջության կենտրոնի գործադիր տնօրեն Խաչանուշ Հակոբյանն էլ իր հերթին նշեց, որ միամսյակի ընթացքում իրենց մասնագետները կանանց ստուգումներ իրականացնելու են Դավիթ Անհաղթ հիվանդանոցի տարածքում գործող պոլիկլինիկայում և թիվ տասնյոթ պոլիկլինիկայում:
«Ընդ որում, երեքշաբթի մեր մասնագետները կանանց կընդունեն Դավիթ Անհաղթ հիվանդանոցի պոլիկլինիկայում, ուրբաթ` թիվ տասնյոթ պոլիկլինիկայում: Բոլոր ստուգվածների միջից մեր կենտրոն կհրավիրենք չարորակ գոյացություններ ունեցող կանանց և կպարտավորվենք նրանց ապահովել անվճար մամոգրաֆիական ծառայությամբ»,- ասաց նա:
Առողջապահության նախարարության Մայրական և վերարտադրողական առողջության բաժնի պետ Գայանե Հակոբյանն էլ կանանց խորհուրդ տվեց տարին առնվազն մեկ անգամ օգտվել անվճար հետազոտվելու իրենց իրավունքից: «Իրենց առողջության հանդեպ առավել ուշադիր պետք է լինեն հատկապես հիսունն անց կանայք»,- նշեց նա:
Լուսանկարը՝ Armenpress-ի
