ԱՄՆ պաշտպանության նախարար Չակ Հեյգելը, երեքշաբթի ելույթ ունենալով զինված ուժերի հարցերով Սենատի կոմիտեի հադիպման ժամանակ 2015-ի Պենտագոնի բյուջեի վերաբերյալ լսումներին, օրենսդիրներին իր դիրքորոշումն է հայտնել ուկրաինական ճգնաժամի առնչությամբ:
Հեյգելը նշել է, որ ինքն ամբողջովին աջակցում է Ուկրաինայում իրավիճակի լիցքաթափման՝ Օբամայի վարչակազմի մոտեցմանը:
«Ես մշտապես կապի մեջ եմ ՆԱՏՕ-ի նախարարների, ինչպես նաև Ռուսաստանի և Ուկրաինայի պաշտպանության նախարարների հետ»,- ասել է նա՝ հավելելով, որ կարգադրություն է արել Ռուսաստանի հետ ռազմական համագործակցության դադարեցման մասին:
«Վերջին շաբաթների իրադարձությունները ցույց տվեցին Ամերիկայի գլոբալ առաջատարության և ներգրավվածության անհրաժեշտությունը»,- ասել է Հեյգելը: Այս մասին փոխանցում է «Ամերիկայի ձայնը»:
Հեյգելն ասել է, որ համաձայն է պետքարտուղար Քերիի գնահատականին, որ Ռուսաստանի հայտարարությունները Ղրիմում ռուսների հանդեպ սպառնալիքների մասին պարզապես ներխուժման պատրվակ էին:
Իր հերթին, շտաբների պետերի միացյալ կոմիտեի ղեկավար, գեներալ Մարտին Դեմփսին ասել է, որ ինքը խորհուրդ է տվել դադարեցնել ռազմական համագործակցությունը Ռուսաստանի հետ, քանի որ Ռուսաստանն այլընտրանք չի թողել:
Խոսելով ցանկացած իրավիճակին պատրաստ լինելու անհրաժեշտության մասին՝ նա նշել է, որ երբեք պետք չէ հաշվից հանել երկու երկրների միջև հակամարտության հնարավորությունները:
