Սահմանադրության տոնը Ֆեյսբուքի բազմաթիվ օգտատերեր յուրովի են նշում: Դեռևս գիշերվանից այստեղ ստեղծվել է միջոցառում (event), որը կոչվում է «Դե ֆակտո սահմանադրություն»: Այստեղ մարդիկ ներկայացնում են Սահմանադրության հոդվածների իրենց տարբերակները, որոնք ծաղրական քննադատություն են պարունակում գործող Սահմանադրության նորմերի պրակտիկ իրականացման և վիճակի հասցեին: Ստորև ներկայացնում ենք ամենաուշագրավ գրառումները` առանց հեղինակների հիշատակման:
Հայաստանի Հանրապետությունը բռնատիրական, օլիգարխիկ, անրիավ ռուսական գուբերնիա է:
***
Հայաստանի Հանրապետությունում իշխանությունը պատկանում է Սերժ Սարգսյանին:
Սարգսյանն իր իշխանությունն իրականացնում է քրեական տարրերի, սափրագլուխների, ինչպես նաև Սահմանադրությամբ նախատեսված պետական և տեղական՝ թաղային հեղինակությունների և ուզուրպատոր անձանց միջոցով:
Իշխանության յուրացումն ընդդիմության կամ ընդդիմադիր անհատի կողմից հանցագործություն է:
***
Պատգամավորը պարտավոր է զբաղվել ձեռնարկատիրական գործունեությամբ, զբաղեցնել պաշտոն պետական կամ տեղական ինքնակառավարման մարմիններում կամ առևտրային կազմակերպություններում, կատարել այլ վճարովի աշխատանք, բացի գիտական, մանկավարժական և ստեղծագործական աշխատանքից
***
Հայաստանի Հանրապետության դրոշը եռագույն է՝ կարմիր, կապույտ, փոփոխական:
***
Ինչպես նկատեց Հ.Բադալյանը, «առայժմ ճիշտ կլինի հուլիսի 5-ը համարել ՀՀ Սահմանադրության հիշատակի օր»
***
Ոչ ոք չունի մտքի, խղճի, դավանանքի ազատության իրավունք: Յուրաքանչյուր այդպիսի դրսևորում պատժվում է օրենքով սահմանված կարգով:
***
Հայաստանի Հանրապետությունում Ժողովուրդը պատկանում է իշխանությանը։
Ժողովուրդը չունի որևէ իրավունք (բացի իշխանությանը պատկանելու իր անվերապահ իրավունքից)։
Իշխանության յուրացումը որևէ կազմակերպության կամ անհատի կողմից խրախուսվում է Ռուսաստանի Դաշնության, ինչպես նաև ցանկացող այլ գերտերությունների կողմից։
***
Պետությունն ապահովում է շրջակա միջավայրի անխնա շահագործումն ու ավերումը, բնական պաշարների անխնա հոշոտումը:
***
ՀՀ կառավարությունը իրականացնում է Ռուսաստանի Դաշնության պետական քաղաքականությունը գիտության, կրթության, մշակույթի, առողջապահության, սոցիալական ապահովության և բնության պահպանության բնագավառներում:
***
ՀՀ վարչապետը չընտրված նախագահի և մի քանի օլիգարխների հետ քննարկում է պետական բյուջեն, ապահովում մուտքերի կատարումը՝ ցանկացած միջոցներով ստորացնելով հատկատուներին (մեծ բիզնեսները ազատված են հարկերից). ՀՀ կառավարությունը որևէ հաշվետվություն չի ներկայացնում հարկատուներին բյուջեի ծախսերի վերաբերյալ: Պետական բյուջեի հաշվետվության պահանջը քրեորեն պատժելի է:
***
Հայաստանի Հանրապետությունում արդարադատություն չի իրականացվում համապատասխան կառույցների մուտացիայի պատճառով:
***
Հայաստանի Հանրապետության պետական լեզուն մայրենին է:
***
Մարդը, նրա արժանապատվությունը, հիմնական իրավունքները և ազատությունները ստորագույն արժեքներ են:
ՀՀ քաղաքացիները պետք է ենթարկվեն խոշտանգումների, ինչպես նաև անմարդկային կամ նվաստացնող վերաբերմունքի կամ պատժի։ Ձերբակալված, կալանավորված եւ ազատազրկված անձինք չունեն մարդասիրական վերաբերմունքի եւ արժանապատվության հարգման իրավունք: Մարդուն կարելի է առանց իր համաձայնության ենթարկել գիտական, բժշկական եւ այլ փորձերի և նվաստացումների:
***
Օլիգարխը, նրա արժանապատվությունը, հիմնական իրավունքները և ազատությունները բարձրագույն արժեքներ են:
Պետությունն ապահովում է օլիգարխի և օրինազանցի հիմնական իրավունքների և ազատությունների պաշտպանությունը՝ միջազգային իրավունքի սկզբունքներին ու նորմերին ի հակադրումն:
Պետությունը սահմանափակված չէ մարդու և քաղաքացու հիմնական իրավունքներով և ազատություններով՝ որպես անմիջականորեն չգործող իրավունք:
http://www.facebook.com/event.php?eid=179205795472267