Այսօր կառավարության շենքի մոտ լրագրողները ՀՀ գլխավոր դատախազ Գևորգ Կոստանյանից հետաքրքրվեցին «Արարատցեմենտ» գործարանի շուրջ զարգացումներից. ինչու այն դրոշմվեց, ինչու գործարանը ջրազրկվեց:
ԲՀԿ-ն սա որակում է ճնշում իրենց նկատմամբ՝ կապելով դա ԲՀԿ վերջին համագումարին Գագիկ Ծառուկյանի ելույթի հետ:
ՀՀ գլխավոր դատախազ Գևորգ Կոստանյանը նշեց, որ քրեական գործ հարուցելուց հետո անմիջապես ստուգումներ են սկսվել: «Ես այդ ելույթները չեմ լսել, չեմ պատրաստվում լսել, քանի որ ինձ համար այդ ելույթները տվյալ գործի շրջանակում և ընդհանրապես հետաքրքրություն չեն ներկայացնում»,- ասաց նա:
Նա նշեց, որ չգիտի՝ ինչի է Ծառուկյանի թիմը համոզված, որ դա ճնշում է. «Եթե որևէ մեկը ճնշում է համարում այն հանգամանքը, որ հարուցված քրեական գործով զննություն անցկացվի, և անցկացվում է, և դա դիտվում է ճնշում, ես անկեղծորեն ոչ մի հիմնավորում չեմ տեսնում: Ես բազմիցս բացատրեցի այստեղ քննչական գործողություններ կատարելու մասին, որևէ մեկին այդ գործով դեռևս մեղադրանք առաջադրված չէ, իրականացվելու են քննչական գործողություններ՝ անկախ նրանից, թե դա ինչ շահարկումների տեղիք կտա»,- ասաց Գլխավոր դատախազը:
Մայդանում ծավալվող իրադարձությունների, հայկական մայդանի մասին դատախազը խուսափեց խոսել:
Նա մոտեցավ բանակում խաղաղ պայմաններում զոհված զինվորների մայրերին, որոնք նրան փոխանցեցին, որ իրավաբան չեն կարող գտնել իրենց գործերը քննելու համար: Գևորգ Կոստանյանը խոստացավ մյուս շաբաթ իրավաբան տրամադրել:
Մարտի մեկի ժամանակավոր հանձնաժողով ստեղծելու հարցի շուրջ էլ ասաց. «Նման հանձնաժողով կստեղծվի կամ չի ստեղծվի, դա ոչ մի նշանակություն չունի իմ կողմից իմ ծառայողական պարտականությունների կատարման հետ: Ինչ վերաբերում է բացահայտելուն, բնականաբար, մենք ամեն ինչ կանենք: Մենք խոսում ենք արդյունավետ քննության ապահովման և երաշխավորման մասին, ես վստահեցնում եմ, որ ես կանեմ առավելագույնը այդ արդյունավետ քննությունը երաշխավորելու հմար, ոչ միայն այդ գործով, այլ ցանկացած այլ գործով: Հանձնաժողով կստեղծվի թե ոչ՝ իմ գործողությունների և լիզորությունների իրականացման հետ քիչ առնչություն ունի»,- ասաց նա:
