«Մամուլի հետ սուրճ» հաղորդման մարտի 4-ի հյուրը «Իմ քայլը» խմբակցության պատգամավոր, «Հոդված 3» ակումբի նախկին ղեկավար Գայանե Աբրահամյանն է։
Ըստ մեր զրուցակցի՝ ֆեյքերի դեմ պայքարը լուրջ խնդիր է, և հիմա ամբողջ աշխարհում քննարկվում է, թե օրինական ինչ միջոցներով է հնարավոր այդ պայքարը մղել։
Ինչ վերաբերում է այսօրվա իշխանությունների դեմ սոցցանցերում մղվող պայքարին, մեր զրուցակիցն ասաց. «Հստակ որոշում կա մեզ մոտ՝ չի կիրառվելու ֆեյքային պայքարը։ Շատ շատերս կարող ենք չհամաձայնել, որովհետև ուղղակիորեն պարտվում ենք այդ տիրույթում։ Սա խաղի կանոնների ավելի մաքուր ու արդար պայքար է։ Բայց կարծում եմ, որ շատ կարևոր է նաև մյուս գործիքը կիրառել՝ մեդիագրագիտության բարձրացումը»։
Գայանե Աբրահամյանի դիտարկմամբ՝ մեդիաների 80 կամ 90 տոկոսը պատկանում է նախկին իշխանություններին ու արտահայտում նրանց կարծիքը. «Մեդիագրագիտության կարևորագույն սկզբունքներից մեկն է հասկանալ, թե ում է պատկանում այդ լրատվամիջոցը, որտեղից է սնվում։ Այստեղ մենք որոշակի օրենսդրական փոփոխության անհրաժեշտություն ունենք. պետք է հրապարակվի ու ավելի թափանցիկ դառնա ֆինանսական հաշվետվությունը»։
