Օրեր առաջ ՊԵԿ-ի կողմից հրապարակվեց վերջին երկու ամիսների կտրվածքով խոշոր 1000 հարկատուների ցանկը, և առաջին տասնյակում բավականին նկատելի վերադասավորություններ են տեղի ունեցել։ Այս ամենը, ըստ ձեզ, ինչի հետևանք է «Առաջին լրատվական»-ի հարցին ՀՅԴ Բյուրոյի տնտեսական հետազոտությունների գրասենյակի համակարգող Թադևոս Ավետիսյանը պատասխանեց․ «Կարծում եմ՝ շատ կարևոր տեղեկատվություն կա։ Այս ցուցակի վերլուծությունը բավականին հատկորոշում է տնտեսական զարգացման միտումները։ Այո՛, փոփոխություններ կան, և, թերևս, ոչ միայն առաջին տասնյակում, այլ ամբողջ ցանկում։ Բայց մի քանի հաստատում անեմ, ինչը, կարծում եմ՝ ուշագրավ է հենց այդ իմաստով։ Տեսեք՝ առաջին տասնյակից դուրս է մնացել ՀԷՑ-ը և նրա տեղ ավելացել է «Ինտերնեյշնլ Մասիս Տաբակ»-ը։ Այստեղ թերևս մտածելու բան կա, որովհետև կարծում եմ՝ էլեկտրաէներգիայի սպառման ծավալներն էապես չեն փոխվել։ Երկրորդն այն է, որ առաջին տասնյակում գտնվող տնտեսվարողների ընդհանուր վճարած հարկերը՝ և՛ ուղղակի, և՛ անուղղակի, 2017 թվականի համեմատ աճել են 14 տոկոսով։ Բայց ընդհանուր առմամբ հարկերն ավելացել են 8 տոկոսով»։
Իսկ Միջազգային և անվտանգության հարցերի հայկական ինստիտուտի փորձագետ Ջուլիետա Թադևոսյանն էլ հավելեց․ «Ողջունելի է, որ առաջին հորիզոնականում հայտնվել է տեղական արտադրողը։ Բայց այստեղ մտահոգիչն այն է, որ առաջին տասնյակում միայն մեկ արտադրական ձեռնարկություն է, հիմնականում հանքարդյունաբերական կամ ներկրող ընկերություններ են։ Լավ կլիներ, որ մի երեք հայրենական արտադրող լիներ առաջին տասնյակում։ Բայց այն քննադատությունները, որ հարկերի չափերի ավելացումը քիչ է և հուսադրող չէ, պետք է ասեմ, որ ցանկացած հեղափոխությունից հետո տնտեսության մեջ հնարավոր է նաև վայրէջքներ, անկումներ, ուստի, ես կարծում եմ՝ պետք է հուսադրող համարենք այն, որ վայրէջքին ականատես չենք, որոշակի՝ ցածր, բայց կայուն տեմպեր պահպանվում են»։
Մանրամասները՝ տեսանյութում։
