«Առաջին լրատվական»-ի զրուցակիցն է «Լուսավոր Հայաստան» խմբակցության քարտուղար Գևորգ Գորգիսյանը։
– Պարոն Գորգիսյան, 2017 թվականին ԱԺ «Ելք» խմբակցությունը հանդես եկավ ԵԱՏՄ-ին Հայաստանի անդամակցությունը դադարեցնելու նախաձեռնությամբ, որն այն ժամանակ պաշտպանում էր նաև վարչապետ Նիկոլ Փաշինյանը։ Նորընտիր ԱԺ-ի ԼՀ խմբակցությունը առաջարկում է ստեղծել ԵԱՏՄ-ում Հայաստանի անդամակցության հարցերով խորհրդարանական մշտական հանձնաժողով։ Ի՞նչ նպատակ է հետապնդում ձեր այդ նախաձեռնությունը, և արդյոք հնարավո՞ր է, որ առաջիկայում նորից հանդես գաք ԵԱՏՄ-ին Հայաստանի անդամակցությունը դադարեցնելու առաջարկությամբ։
– Մենք այն ժամանակ հայտարարում էինք, որ ԵԱՏՄ-ին անդամակցությունը չի բխում Հայաստանի շահերից։ Հիմա նոր իշխանությունները պնդում են, որ մեր անդամակցությունը կօգտագործեն ի շահ Հայաստանի, և մենք սպասում ենք՝ տեսնելու արդյունքները։ ԵԱՏՄ-ի հետ կապված խնդիրները շատ են, և այդ խնդիրները մենք ստիպված ենք տարբեր ոչ ֆորմալ հարթակներում բարձրաձայնել, որոնք նախատեսված չեն այդ խնդիրների բարձրաձայնման համար։ Բայց եթե մենք շարունակում ենք մնալ ԵԱՏՄ անդամ, ապա պետք է լինի մշտական կառույց, որը կզբաղվի ԵԱՏՄ-ի բոլոր խնդիրներով, պետք է օգտագործվեն խորհրդարանական դիվանագիտության բոլոր օղակներն ու լծակները այդ խնդիրներին լուծումներ առաջարկելու համար։ Մենք ունենք Եվրաինտեգրման հանձնաժողով, պետք է ունենանք նաև ԵԱՏՄ հանձնաժողով, որը կզբաղվի Հայաստան-ԵԱՏՄ հարցերով։
– Ձեր առաջարկը իշխանությունների կողմից կարծես ընդունվել է, բայց հանձնաժողովի հարցով նախապատվությունը, մամուլի հրապարակումների համաձայն, տրվում է ԲՀԿ-ին։ Սա Ձեզ համար ընդունելի՞ է։
– Ինչ-որ մեկը չի կարող նախապատվություն տալ նախագահության հարցում, կա Դոնթի բանաձև, որով բաշխվում են բոլոր հանձնաժողովների նախագահությունները, և խմբակցությունները իրենք են ընտրում, թե որ հանձնաժողովն են ուզում նախագահել։ Դեռ վերջնական ցուցակը չկա, թե քանի հանձնաժողով և որ հանձնաժողովները պետք է լինեն, երբ դա վերջնական հրապարակվի, ապա ըստ այդմ՝ Դոնթի բանաձով կորոշվի, թե որ հանձնաժողովը ով է նախագահելու։
– Եթե այս իշխանությունների օրոք ևս առաջանան խնդիրներ ԵԱՏՄ-ում և լուծումներ չստանան, հնարավոր համարո՞ւմ եք Հայաստանի անդամակցության դադարեցման մասով նորից նախաձեռնությամբ հանդես գալ։
– Մեր բոլոր առաջարկներն ու նախաձեռնությունները մշտապես բխել են Հայաստանի Հանրապետության շահերից։ Եթե մենք ինչ-որ պահի համարենք, որ Հայաստանի Հանրապետության շահերից բխում է ԵԱՏՄ-ից դուրս գալը, ապա չենք հապաղի նորից այդ նախաձեռնությամբ հանդես գալ։ Կրկնում եմ՝ եթե դա բխի ՀՀ քաղաքացու շահերից։ Այժմ պետության ղեկավարը նշում է, որ Հայաստանի շահերից է բխում մնալ ԵԱՏՄ-ում, մենք ուշի-ուշով հետևում ենք՝ տեսնելու այդ շահերը։