«Այս ընտրություններով քաղաքական սերնդափոխություն չի եղել, չկան նոր դեմքեր, խորհրդարան անցավ հին ուժերից ԲՀԿ-ն: Բայց հուսով եմ՝ ավարտվեց հեղափոխությունների փուլը, և սկսվում է համակարգային աշխատանքի շրջանը»,- «Առաջին լրատվական»- ի հետ քննարկմանն այս մասին ասաց լեզվաբան, վերլուծաբան Նարինե Դիլբարյանը:
Լրագրող Կարպիս Փաշոյանը հավելեց, որ ԲՀԿ-ն չի կարող գոյատևել այն տեսքով, որով նախկինում է եղել. «Անշուշտ, պետք է տրանսֆորմացվի և փոխի խաղի կանոնները: Կարծում եմ՝ Գ. Ծառուկյանը մանդատից պետք է հրաժարվի, քանի որ նա այլևս պետությունից պաշտպանվելու անհրաժեշտություն չունի. նա պետք է մի կողմ քաշվի և թույլ տա, որ կուսակցությունը տրանսֆորմացվի և դառնա դասական քաղաքական ուժ, ոչ թե մնա որպես մեկ խոշոր սեփականատիրոջ շուրջ ձգողականությամբ համախմբված արհեստական գոյացություն: Գ. Ծառուկյանը կարող է այդ քաղաքական ուժի լոբբինգով կամ ֆինանսավորմամբ զբաղվել»:
Ն. Դիլբարյանը նկատեց, որ բոլոր կուսակցությունները, այդ թվում նաև «Իմ քայլը» դաշինքը, հզոր անհատների շուրջ են կառուցված, և հաջողություն ունցան այն ուժերը, որոնց առաջնորդները ակտիվ էին:
«Մենք խորհրդարանում կտեսնենք և՛ ծանոթ, և՛ անծանոթ դեմքեր: Քաղաքականության մեջ հաջողություն ունենալու համար Մելիք-Ադամյան փողոցով անցնելու համակարգը փլուզվել է, և քաղաքական հաջողություն ունենալու հնարավորություն է առաջացել «Իմ քայլ»- ում. նոր դեմքերի մի մասը կհաջողի»,- այս մասին նշեց Քաղաքական դասընթացների երևանյան դպրոցի տնօրեն Արմեն Զաքարյանը: Նրա դիտարկմամբ՝ ժողովուրդը դուրս եկավ հեղափոխության, քանի որ նախկին ուժը չէր իրականացնում իր սպասելիքները. «Նոր իշխանությունն ու ընդդիմությունը պետք է ժողովրդի սպասելիքների իրականացմանն ուղղված իրենց գործողությունների նկատմամբ հավատ առաջացնեն»:
Ն. Դիլբարյանի դիտարկմամբ՝ ԼՀԿ-ն և ԲՀԿ-ն քարոզարշավի ընթացքում իրենց չեն դրսևորել որպես հակակշռող ուժեր, բայց խորհրդարանում հակակշռող ուժի առկայությունն անհրաժեշտ կլինի. ընդդիմության տեղը դատարկ չի մնա: Կ. Փաշոյանը նշեց, որ հնարավոր է «Իմ քայլը» դաշինքի ներսում ևս ընդդիմադիր բևեռ առաջանա:
Մանրամասն՝ տեսանյութում: