Երեկ կայացան Wimbledon-ի 1/8 եզրափակիչի բոլոր հանդիպումները: Եթե տղամարդկանց պայքարում խոշոր անակնկալներ չեղան, և ATP վարկանիշային աղյուսակի բոլոր 4 առաջատարները շարունակում են պայքարը, ապա կանանց պայքարում միանգամից մի քանի սենսացիա գրանցվեց:
Նախ անդրադառնանք տղամարդկանց մրցաշարին: Աշխարհի թիվ 1 ռակետ Ռաֆայել Նադալը մեծ դժվարությամբ հաղթահարեց վնասվածքից նոր ապաքինված արգենտինացի Խուան Մարտին դել Պոտրոյի արգելքը` 3:1 (7:6, 3:6, 7:6, 6:4): Քառորդ եզրափակիչում իսպանացին կհանդիպի ԱՄՆ-ի ներկայացուցիչ Մարդի Ֆիշի հետ, որը 3 սեթում (7:6, 6:4, 6:4) հաղթեց անցյալ տարվա եզրափակիչի մասնակից, չեխ Տոմաշ Բերդիխին:
Երկրորդ ռակետ սերբ Նովակ Ջոկովիչը խնդիր չունեցավ ֆրանսիացի Միշել Լոդրայի հետ խաղում. երեք սեթում էլ գրանցվեց միևնույն՝ 6:3 հաշիվը: Հաջորդ փուլում Նովակը կմրցի այս առաջնության հայտնություն ճանաչված 19-ամյա ավստրալացի թենիսիստ Բեռնարդ Տոմիչի հետ:
Ռուս Միխաիլ Յուժնին միայն առաջին սեթում կարողացավ լուրջ պայքար մղել երրորդ ռակետ, շվեյցարացի Ռոջեր Ֆեդերերի հետ. գրանցվեց 6:7, 6:3, 6:3, 6:3 հաշիվ: Քառորդ եզրափակիչում Ֆեդերերի մրցակիցը կլինի Ֆրանսիայի ներկայացուցիչ Ժո Վիլֆրեդ Ցոնգան:
Չորրորդ ռակետ Էնդի Մարեյը նույնպես հեշտությամբ նվաճեց քառորդ եզրափակիչի ուղեգիրը: Բրիտանացուց 3 սեթ պահանջվեց (7:6, 6:3, 6:2) ֆրանսիացի Ռիշար Գասկեին պարտության մատնելու համար: Հաջորդ փուլում Մարեյը կմրցի իսպանացի Ֆելիցիանո Լոպեսի հետ:
Իսկ ահա կանանց մրցաշարում մեկ օրվա ընթացքում պայքարից դուրս մնացին ոչ միայն Ուիլյամս քույրերը, այլև՝ աշխարհի առաջին ռակետ դանիացի Կարոլին Վոզնիացկին: Սերենան ու Վենուսը միևնույն՝ 2:0 հաշվով զիջեցին համապատասխանաբար ֆրանսուհի Մարիոն Բարտոլիին և բուլղարուհի Ցվետանա Պիրոնկովային: Իսկ Վոզնիացկիին պայքարից դուրս թողեց Սլովակիայի ներկայացուցիչ Դանիելա Ցիբուլկովան:
Քառորդ եզրափակիչում կմրցեն հետևյալ զույգերը՝ Ցիբուլկովա-Շարապովա, Լիսիցկի-Բարտոլի, Պաժեկ-Ազարենկո, Կվիտովա-Պիրոնկովա:
