Ատոմային էներգիայի միջազգային գործակալության պատվիրակությունն այսօր կայցելի Իրան՝ «վեցյակի» և Իրանի միջև ժնևյան պայմանավորվածությունների կատարմանը նախապատրաստվելու համար: Այս մասին հայտնում է IRNA գործակալությունը՝ հղում անելով Իրանի ատոմային էներգիայի կազմակերպությանը:
ԱԷՄԳ-ի մամլո քարտուղար Ջիլ Տյուդորը երեկ RIA Novosti-ին հայտնել էր, որ Գործողությունների համատեղ ծրագրի կատարման համար կարվեն անհրաժեշտ նախապատրաստություններ, սակայն նշել է, որ գործակալությունն ավանդաբար չի մեկնաբանում տեսուչների տեղաշարժը:
Պայմանավորվածություններն ուժի մեջ են մտնում հունվարի 20-ին:
ԱԷՄԳ-ի կառավարիչների խորհրդի արտահերթ նիստը, որի ժամանակ, ինչպես սպասվում է, ԱԷՄԳ-ի քարտուղարությանը կտրվեն ժնևյան պայմանավորվածությունների կատարումը ստուգելու լիազորությունները, կկայանա հունվարի 24-ին: ԱԷՄԳ-ի գլխավոր տնօրեն Յուկիա Ամանոն, ինչպես սպասվում է, կներկայացնի ստուգումներին ուղղված հստակ միջոցառումների մասին զեկույց՝ հիմնված տեխնիկական փաստաթղթի վրա, որը մշակել էին «վեցյակի», Իրանի և ԱԷՄԳ-ի փորձագետները:
IRNA գործակալության փոխանցմամբ՝ հունվարի 29-ին սպասվում է, որ ԱԷՄԳ-ը կայցելի Գաչինի ուրանի հանքավայրը՝ Իրանի ու ԱԷՄԳ-ի միջև շրջանակային համաձայնագրի շրջանակում, որը ստորագրվել էր Թեհրանում՝ նոյեմբերի 11-ին:
