Տավուշի մարզի ընդհանուր իրավասության դատարանում Զոյա Զաքինյանի նախագահությամբ ավարտվել է Հրանտ Անանյանի գործի դատական քննությունը:
Նախկինում դատված 30-ամյա Հրանտին մեղադրանք էր առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ըստ մեղադրանքի՝ 2017 թվականի հուլիսի 5-ին, ժամը 22-ն անց 20-ի սահմաններում Բերդ քաղաքի «Միջի աղբյուր» կոչվող պուրակի դիմացի հատվածում կայանված, տուժող Դավիթ Բ.-ին պատկանող «ՎԱԶ- 2121» մեքենայում վիճաբանության ժամանակ Հրանտ Անանյանն իր մոր հասցեին հնչեցված հայհոյանքի պատճառով կտրող-ծակող գործիքով հարվածել է 29-ամյա Դավիթ Բ.-ի որովայնի շրջանին ու սպանել է նրան:
Դատարանը հաստատված է գնահատել, որ Հրանտ Անանյանն ու տուժող Դավիթ Բ.-ն միմյանց հետ գտնվելով ընկերական հարաբերությունների մեջ, պայմանավորվել են դեպքի օրը հանդիպել՝ պարզաբանում կատարելու համար:
Ժամը 21-ն անց 40-ի սահմաններում Հրանտ Անանյանը գնացել է Բերդ քաղաքում գործող «Բերդ» տաքսի ծառայություն, նախապես տաքսի է պատվիրել՝ որոշ ժամանակ անց իրեն Իջևան տեղափոխելու համար, ապա գնացել է Դավիթի հետ հանդիպման:
Վերջինիս պատկանող «Նիվա» մեքենայով նրանք շրջել են քաղաքում, ապա Դավիթը մեքենան կայանել է Բերդ քաղաքի «Միջի աղբյուր» կոչվող պուրակի դիմացի հատվածում: Նրանք մեքենայի մեջ շարունակել են վիճաբանությունը, որի ժամանակ Դավիթ Բ.-ն Հրանտի մոր հասցեին հայհոյանք է տվել:
Հրանտ Ա.-ն, ըստ դատական ակտի, հանել է գրպանում եղած դանակը ու հարվածել է Դավիթի որովայնի շրջանին:
Այնուհետև Հրանտը կանչել է նախապես պատվիրած տաքսին, նստել ու մեկնել է Իջևանի ուղղությամբ: Իսկ վնասվածք ստացած Դավիթն ընկել է «Միջի աղբյուր» կոչվող պուրակի դիմացի աստիճանների վերևի հատվածում: Մոտակա ռեստորանից մարդիկ մոտեցել, նրան օգնություն են ցույց տվել, տեղափոխել են հիվանդանոց, որտեղ նա կարճ ժամանակ անց ստացած վնասվածքից մահացել է:
Դատարանում Հրանտ Անանյանն իրեն մեղավոր է ճանաչել, հայտնել է, թե ինչ-որ կետերի հետ համաձայն չէ, բայց չի ցանկանում ցուցմունք տալ:
Նախաքննական ցուցմունքում Հրանտ Անանյանը հայտնել էր, որ ինքն ու տուժող Դավիթը միմյանց վաղուց են ճանաչել, միշտ նորմալ հարաբերությունների մեջ են եղել: Ինքը հաճախ է օգնել Դավիթին տարբեր հարցերում: Վերջին անգամ Դավիթը իր օգնությանն է դիմել մի հարցով, ինքն ասել է, թե չի կարող օգնել:
Դեպքի օրը՝ 2017 թվականի հուլիսի 5-ին, Դավիթը մի քանի անգամ զանգել ու իրեն խնդրել օգնել, ինքն էլ պատասխանել է, որ կարող են հանդիպել, ու ինքը կբացատրի, թե ինչու չի ցանկանում այդ հարցով օգնել:
Հանդիպել են Բերդ քաղաքի Մաշտոցի փողոցում: Ինքը նստել է Դավիթի «Նիվա» մեքենան, զրուցելով երկու շրջան պտտվել են Բերդ քաղաքում:
Դավիթը գարեջուր է գնել, հյուրասիրել է: Ինքը ամբողջ ընթացքում փորձել է նրան բացատրել, թե ինչու չի կարող օգնել: Իրենց մեջ լեզվակռիվ է սկսվել:
Դավիթը մեքենան կանգնեցրել է ավտոկայանի մոտ, երկուսով քայլել են դեպ «Միջի աղբյուր» կոչվող պուրակ:
Աստիճանների մոտ կանգնել են դեմ-դիմաց, սկսել են վիճել: Դավիթը բռնել է իր պարանոցից ու հայհոյել է իր մորը: Ինքը զայրացել է, ասել է՝ բաց թող: Բայց նա բաց չի թողել: Ինքը շալվարի գրպանից հանել է ծալովի դանակը, բացել ու ցանկացել է հարվածել նրա ոտքին, բայց Դավիթն ինչ-որ շարժում է կատարել, ու դանակը մտել է նրա փորը:
Ինքը նստել է պատահական տաքսի ու գնացել Իջևան, այնտեղից էլ պատահական մեքենայով գնացել է Երևան…
Տուժողի իրավահաջորդը՝ տուժող Դավիթի եղբայրը, հայտնել է, որ Դավիթը դեպքի հաջորդ օրվա համար ՌԴ մեկնելու տոմս էր գնել: Դեպքի օրվա երեկոյան նա տնից դուրս է եկել՝ ասելով, թե պետք է հանդիպի Հրանտին: Ինքը մի քանի անգամ զանգել է Դավիթին, ասել է՝ արի, իրերդ հավաքի: Վերջին անգամ եղբորից լսել է. «Հանդին ինձ խփեց»: Ինքն անմիջապես մեքենայով իջել է «Միջի աղբյուր» կոչվող տարածք, բայց եղբորն արդեն հիվանդանոց էին տարել:
Ինքը միշտ անհանգստացել է եղբոր համար, հաճախ է նրան զանգել, հարցրել է՝ որտեղ է, ինչով է զբաղված: Դեպքի օրը եղբայրը սկզբում ասել է, թե Հրանտի հետ է, «էսա կգա»: Վերջին անգամ ասել է. «Հանդին ա խփել»:
Ըստ տուժողի իրավահաջորդի՝ «քանի որ ամբաստանյալը հանցագործ էր», ինքը չի ցանկացել, որ եղբայրը նրա հետ շփվի: Եղբայրը 100 հազար ռուբլով մեքենա էր վաճառել ու էժան «Նիվա» էր գնել: Մնացած գումարը չի կարող ասել՝ ինչ է արել: Իր հարցին եղբայրը պատասխանել է, թե գումարը պրծել է, ծախսվել է: Եղբայրը փակ անձնավորություն էր, իր հետ չէր կիսվում…
Հրանտ Անանյանը դատահոգեբուժական փորձաքննության եզրակացությամբ ճանաչվել է մեղսունակ: Նրա մոտ հայտնաբերվել է բնավորության գծերի շեշտվածություն:
Դատարանն արձանագրել է հանցագործությունների կատարման ռեցիդիվ Հրանտ Անանյանի կողմից՝ նա նախկինում երկու անգամ դատապարտվել էր՝ ավազակային հարձակման, ապա՝ ապօրինի զենք պահելու համար, ունեցել է պատժի չկրած մաս:
Հրանտ Անանյանը մեղավոր է ճանաչվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով, և վերջին հաշվով դատապարտվել է 12 տարի 2 ամիս 5 օր ազատազրկման:
Պատժի սկիզբը՝ 2017 թվականի հուլիսի 12-ից: