Ֆուտբոլի Հայաստանի ազգային հավաքականը հաղթանակով սկսեց ելույթն Ազգերի լիգայի խաղարկությունում: Վազգեն Սարգսյանի անվան «Հանրապետական» մարզադաշտում դժվարությամբ, բայց 3 միավոր վաստակեցինք Լիխտենշտեյնի հետ մրցավեճում: Այսօր դժվար թե գտնվի ֆուտբոլասեր, որը գոհ լինի մերոնց ցուցադրած խաղից: Հայաստանի հավաքականի խաղը չէր ստացվում, և եթե մի քանի ֆուտբոլիստներ գործի չդնեին անհատական վարպետությունը, հնարավոր է, որ չվաստակեինք այդքան անհրաժեշտ 3 միավորը:
Մեր հավաքականը խաղը սկսեց առանց նոմինալ հարձակվողի: Վարդան Մինասյանը շեշտը դրել էր ընդգծված հարձակողական կիսապաշտպանության վրա՝ ի դեմս Մարկոս Պիզելիի, Արաս Օզբիլիսի և Իվան Յագանի: Այո, դաշտի միջին հատվածում մերոնք ակտիվ էին, բայց մրցակցի տուգանային հրապարակին մոտենալը խնդիր էր: Չկար այն հարձակվողը, որը մշտապես լարվածության մեջ կպահեր մրցակցի պաշտպաններին: Հնարավոր է՝ մեկնարկային կազմում Արթուր Սարկիսովի ներկայությունը նպաստեր, որ մեր գրոհներն ավելի սուր լինեին: Վարդան Մինասյանին հաջողվել է որոշակիորեն փոխել և վերակենդանացնել խաղը: Մեր ֆուտբոլիստներն անհամեմատ ավելի արագ էին դուրս գալիս սեփական կիսադաշտից:
«Ես միշտ կապի մեջ եմ Յուրայի հետ։ Վերջին անգամ մոտ 10 օր առաջ եմ զրուցել նրա հետ։ Նա մինչև վերջին պահը ակումբ էր փնտրում։ Ես նրան ասել էի, որ ակումբ գտնելու և գոնե 2 հանդիպում անցկացնելու դեպքում անպայման հրավիրելու եմ ազգային հավաքական, ինչը եղավ Հովհաննես Համբարձումյանի դեպքում։ Յուրա Մովսիսյանը մեզ շատ է պետք: Ցավոք, ինչպես տեսանք, դա տեղի չունեցավ։ Սակայն դրական կողմն այն է, որ վնասվածքի ապաքինման կանխատեսված 4 ամսվա փոխարեն նա 2,5 ամսում ապաքինվել է»,-Լիխտենշտեյնի հետ հանդիպումից առաջ ասել է Մինասյանը։
Կարող ենք ասել, որ Վարդան Մինասյանի մարտավարությունը իր ողջ ծավալով կաշխատեր, եթե խաղադաշտում լիներ Յուրա Մովսիսյանը: Կարճ ասած՝ Լիխտենշտեյնի դեմ խաղում չկար վերջակետ դնող: Առանց նոմինալ հարձակվողով խաղալու մարտավարությունը թերի էր:
Երեկվա խաղում սրության պակասը պայմանավորված էր նաև Հենրիխ Մխիթարյանի ոչ այնքան հաջող խաղով: Ավելի ստույգ՝ Մխիթարյանին չէր հաջողվում ակտիվ համագործակցել Մարկոսի և Օզբիլիսի հետ: Մեր հավաքականի ավագը կարծես կտրված էր խաղից ու փորձում էր խաղին սրություն հաղորդել անհատական գործողություններով: Խաղը կարող էր այլ ընթացք ստանալ, եթե Մխիթարյանն իրացներ իր իսկ վաստակած 11-մետրանոցը, բայց… «Այսօր իմ օրը չէր»,- խաղից հետո ասել է Մխիթարյանը:
Լիխտենշտեյնի հետ մրցավեճում մեր հավաքականի կազմում լավագույնը միանշանակ Արաս Օզբիլիսն էր, որը դարձավ երկու գոլային փոխանցման հեղինակ: Օզբիլիսի միայն գնդակի հետ վարվելու վարպետությունը հաճույք է պատճառում երկրպագուներին: Ընդունենք, որ երկրորդ և հաղթական գոլը ծնվեց հենց Օզբիլիսի ֆանտաստիկ անցումների արդյունքում:
Արդեն 2 օրից մեր ընտրանին Սկոպյեում մրցելու է Մակեդոնիայի հավաքականի հետ: Վերջինս մեկնարկային տուրում հյուրընկալվելիս 2:0 հաշվով առավելության է հասել Ջիբրալթարի նկատմամբ: Առաջիկա մրցավեճում անհանգստացնող գլխավոր օղակը շարունակում է մնալ պաշտպանությունը: Երեկվա մրցավեճում Լիխտենշտեյնի երկրորդ լուրջ գրոհը գոլով ավարտվեց: Տվյալ դրվագում պաշտպանությունն ուղղակի փլուզվեց: Հատկապես պաշտպանական եզրերը բավական թույլ են: Հովհաննես Համբարձումյանը մարզավիճակի հետ կապված խնդիր ունի, իսկ ձախ պաշտպանի դիրքը ըստ էության օդից կախված վիճակում է:
«Մենք արդեն սկսել ենք պատրաստվել այդ հանդիպմանը։ Այս ասուլիսին զուգահեռ՝ մեր հանդերձարանում բժիշկները, սննդի մասնագետները արդեն սկսել են իրենց աշխատանքը։ Հուսով ենք, որ մեր քայլերով կկարողանանք արագացնել ֆուտբոլիստների վերականգնողական պրոցեսը և կազմ ու պատրաստ ներկայանալ այդ խաղին։ Նաև ցանկանում եմ նշել, որ հաջորդ խաղին կտեսնեք փոփոխություններ մեկնարկային կազմում»,- ասել է Մինասյանը։
Ինչևէ, մեր հավաքականն առաջին քայլն արեց Ազգերի լիգայում դեպի մեծ հաղթանակ: Լիխտենշտեյնի հետ հանդիպմանը ներկա էր նաև ՀՀ վարչապետ Նիկոլ Փաշինյանը, որը ևս ոգևորում էր ֆուտբոլասերներին: Հաղթանակը հեշտ չտրվեց, բայց, ինչպես ասում են, հաղթողին չեն դատում: Մեր երկրում տեղի ունեցած դրական փոփոխությունների, ինչպես նաև ֆուտբոլում արդեն իսկ հաստատված նոր մթնոլորտի ֆոնին ուղղակի չէինք կարող չհաղթել Լիխտենշտեյնին: «Հանրապետականում» իսկապես բացառիկ մթնոլորտ էր: Ստադիոնի օթյակում չկար այն դժգույն «մասսան», որը տարիներ շարունակ փչացրել է երկրպագուների տոնը: Բոլորը կենտրոնացած էին խաղի վրա և վայելում էին ֆուտբոլը: Կարելի է ասել, որ երեկ, սկսած երկրի ղեկավարից, բոլորը ազգային հավաքականի կողքին էին: Սրանք դետալներ են, որոնք հաղթանակի համար նպաստավոր դաշտ են ստեղծում: Դժվարը հաղթանակի հիմքերը դնելն է: Այսօր ունենք այդ հիմքերը, և պետք է հավատալ, որ Լիխտենշտեյնի նկատմամբ տարած հաղթանակը հաղթական շարքի սկիզբն է:
Հիշեցնենք, որ սեպտեմբերի 8-ին Հայաստանի ազգային հավաքականը Ազգերի լիգայի խաղարկության երկրորդ հանդիպումը կանցկացնի Սկոպյեում՝ մրցելով Մակեդոնիայի հետ:
