ԳԴՀ Ֆրայբուրգ քաղաքի «Մորատ» արվեստի և արվեստագիտության ինստիտուտում «Մշակույթների երկխոսություն» կազմակերպության նախաձեռնությամբ հունիսի 24-ին բացվեց հայ նկարիչ Արման Վահանյանի «Տեսողական գոյացություններ» խորագրով առաջին լայնածավալ անհատական ցուցահանդեսը՝ նվիրված Հայաստանի Հանրապետության 100-ամյա հոբելյանին: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Ցուցահանդեսը կազմակերպվել է Ֆրայբուրգի քաղաքապետարանի մշակույթի վարչության, «Մորատ» ինստիտուտի, Շվեյցարիայի Բազել քաղաքի «Մերիան» հիմնադրամի և ԳԴՀ-ում ՀՀ դեսպանության աջակցությամբ:
Ցուցահանդեսի բացմանը ելույթով հանդես եկավ ԳԴՀ-ում ՀՀ դեսպան Աշոտ Սմբատյանը, ով, մասնավորապես, նշեց, որ այս ցուցահանդեսը, ինչպես ցանկացած մշակութային միջոցառում, լինեն դրանք համերգներ, թե ցուցահանդեսներ, պետությունների և ժողովուրդների միջև մշակութային հարաբերությունների զարգացման համար լավագույն կամուրջներն են: Դեսպանը գոհունակությամբ ընդգծեց, որ Արման Վահանյանն իր ստեղծագործություններով ներկայացնում է հայ ժողովրդի պատմությունն ու արվեստը գերմանացի հանդիսատեսին:
Ելույթներով հանդես եկան նաև «Մորատ» ինստիտուտի տնօրենը, Ֆրայբուրգի քաղաքապետարանի մշակույթի վարչության պետ Բ. Քյոնեկեն, «Մշակույթների երկխոսություն» կազմակերպության հիմնադիր նախագահ Սոնա Հարությունյանը:
Ցուցահանդեսը կշարունակվի մինչև ս.թ. սեպտեմբերի 15-ը: