Եվրաինտեգրման կողմնակիցների նկատմամբ ուժի կիրառումը «կայրի վստահության վերջին կամուրջները» ուկրաինական կառավարության նկատմամբ և կզրկի երկրին ԵՄ-իհետ համաձայնագրի ստորագրման հնարավորությունից՝ հայտարարել է Լիտվայի արտգործնախարար Լինաս Լինկյավիչյուսը:
«Եթե հաղթի խելամիտ մտածողությունը, և եթե կա հասարակության հետ անկեղծ խոսելու ցանկություն, նախկին նախագահների հետ զրուցելու նախագահի նախաձեռնություն, կլոր սեղան, թե ինչպես լուծել խնդիրը, ապա կարելի է ակնկալել նաև կառուցողական արդյունքներ»,- ասել է նա՝ փոխանցում է «Ուկրաինսկայա պրավդան»:
Լիտվայի արտգործնախարարը, ով ներկայում գտնվում է Բրյուսելում, հիշեցել է, որ երեքշաբթի Կիև կժամանի ԵՄ արտաքին գործերի և անվտանգության հարցերով գերագույն ներկայացուցիչ Քեթրին Էշթոնը. «Նա հույս ունի հանդիպել և՛ իշխանությունների, և՛ընդդիմության ներկայացուցիչների, և՛ արտասահմանյան կազմակերպությունների հետ: Նա հույս ունի, հավանաբար, անել ամենագլխավոր ուղերձն այն մասին, որ բռնությունն անընդունելի կլինի»:
«Եթե Ուկրաինայի իշխանությունը ցանկանում է շարունակել երկխոսությունը, ապա պետք է որոշակի նշաններ ցույց տա»,- ասել է Լիտվայի արտգործնախարարը:
