Քիմիական զենքի արգելման կազմակերպությանն այս տարի հատկացված Խաղաղության նոբելյան մրցանակի գումարային հատվածը կուղղվի այն պարգևատրումներին, որոնք կստանան այն անձինք կամ կազմակերպությունները, որոնք զգալի ներդրում կունենան այդ տիպի զինատեսակի դեմ պայքարում: Այդ մասին հայտարարել է կազմակերպության ղեկավար Ահմեդ Ուզյումջյուն, ով ժամանել էր Օսլո՝ խաղաղության մրցանակի հանձնման արարողությանը մասնակցելու:
Ուզյումջյուն ընդգծել է, որ ՔԶԱԿ-ը չի հավակնում Նոբելյան խորհրդի դափնիներին, սակայն կցանկանար ինքնուրույն նշել այն անձանց ջանքերը, ովքեր, իր կարծիքով, մեծապես նպաստել են քիմիական զենքի արգելման Կոնվենցիայի իրականացմանը:
Ըստ կազմակերպության ղեկավարի խոսքերի՝ ՔԶԱԿ-ին մրցանակի շնորհումը հանդիսանում է ինչպես նրա հաջող աշխատանքի ճանաչում վերջին 16 տարվա ընթացքում, այնպես էլ քիմիական զենքի նոր զոհերի առաջացման կանխարգելում: Նոբելյան մրցանակի գումարային մասը կազմում է 8 մլն շվեդական կրոն (1,2 մլն դոլար):
