Այսօր Մատենադարանում տեղի ունեցավ վերջինիս տնօրեն, բանասիրական գիտությունների դոկտոր Հրաչյա Թամրազյանի ծննդյան 60-ամյակին նվիրված հոբելյանական միջոցառումը, որին ներկա էին ՀՀ ԳԱԱ նախագահ Ռադիկ Մարտիրոսյանը, գործընկերներն ու մտերիմները:
ՀՀ ԳԱԱ նախագահ Ռադիկ Մարտիրոսյանն իր խոսքում նշեց, որ հայագիտության ասպարեզում Հրաչյա Թամրազյանը միջին սերնդի լավագույն մասնագետներից է: Նա ասաց, որ Մատենադարանի բախտը բերել է, որ բոլոր տնօրենները ավանդաբար եղել են հայտնի մտավորականներ, որոնք միշտ բարձր են պահել մեր գիտության մակարդակը, որն առնչվել է այս հաստատության հետ, որովհետև «սա ունիկալ հետազոտական կենտրոն է: Ոչ միայն գրապահոց է, այլ հետազոտական ինստիտուտ, որտեղ ամբողջ աշխարհին ներկայացվում են հայ մշակույթի, հայոց պատմության գանձերը:
ԳԱԱ նախագահը Հրաչյա Թամրազյանին պարգևատրեց Ոսկե մեդալով. «Սա հիմնականում տալիս ենք արտասահմանյան բարերարներին, մշակույթի գործիչներին, տեղացիներին գրեթե չենք տալիս: Սակայն Հրաչյա Թամրազյանին բացառություն ենք արել»,- ասաց Ռադիկ Մարտիրոսյանը:
Մատենադարանի տնօրենի խորհրդական Գուրգեն Գասպարյանն էլ իր ելույթում նշեց, որ մեր ժամանակներում քիչ են այն մտավորականները, որոնք անկախ հանգամանքներից՝ հավատարիմ են մնացել իրենց կոչմանը: «Իմ կարծիքով՝ մտավորականին գնահատելու ամենաբարձր ուղենիշը և չափանիշը նրա բարոյական նկարագրի գնահատականն է»,- ասաց նա:
Հրաչյա Թամրազյանը հուզված էր իր 60-ամյակին, նա շնորհակալություն հայտնեց ջերմ խոսքերի և բարձր գնահատականների համար:
