Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ այսօր պետք է սկսվեր Դավիթ Թամրազյանի գործի դատավարությունը:
Ըստ մեղադրանքի՝ 26-ամյա Դավիթ Թամրազյանը, «անձնապես վիրավորված լինելով իր հետ նախկինում հարաբերությունների մեջ եղած, տվյալ պահին հարաբերությունները խզած» Անուշից (անունը փոխված է), դիտավորությամբ ապօրինաբար կյանքից զրկելու նպատակով 2013 թվականի մայիսի 7-ին գնացել է Անուշի վարձակալած բնակարան, ասել, իբր անակնկալ նվեր ունի հանձնելու:
Դավիթն աղջկան խնդրել է փակել աչքերը:
Երբ աղջիկը նվերի ակնկալիքով փակել է աչքերը, Դավիթ Թամրազյանը, ըստ մեղադրանքի, խոհանոցային դանակով կտրել է նրա կոկորդը և սպանել:
Այնուհետև, հանցագործության հետքերը թաքցնելու նպատակով Թամրազյանը, առաջադրված մեղադրանքի համաձայն, հրկիզել է դեպքի վայր հանդիսացող բնակարանը՝ սեփականատիրոջը պատճառելով 680 հազար 437 դրամի գույքային վնաս:
Դավիթ Թամրազյանին մեղադրանք է առաջադրվել դիտավորյալ սպանության և հրկիզման եղանակով ուրիշի գույքը վնասելու համար՝ ՀՀ քրեական օրենսգրքի 104 հոդվածի 1-ին մասով և 185 հոդվածի 2-րդ մասի 1-ին, 2-րդ կետերով:
Այսօրվա դատական նիստը չկայացավ ամբաստանյալի պաշտպանի բացակայության պատճառով:
Մեղադրող Հ. Սարգսյանը մեր զրույցում նշեց, որ հենց սկզբից, երբ ծանոթացել է կատարված սպանության հանգամանքներին, նկատի ունենալով, թե ինչպես էր կտրված տուժող կնոջ կոկորդը՝ կարծիք է հայտնել, թե սպանությունը կատարել է կամ վիրաբույժ, կամ վարսավիր, կամ մսագործ:
«Հիմա ջահելները դանակով հանցագործություն կատարելիս հիմնականում ծակող վնասվածք են պատճառում: Բայց որոշակի մասնագիտության տեր մարդիկ անգամ հանցանքի կատարման պահին գործում են մասնագիտորեն»,- ասաց դատախազը:
Հ. Սարգսյանը հիշեց, որ, նկատի ունենալով տուժողի ծանոթների շատ լայն շրջանակը, սպանությունը բացահայտելիս բազմաթիվ վարկածներ են ստուգվել:
Հանցագործը սպանությունից հետո հրկիզել էր բնակարանը, մատնահետքեր կամ այլ հուշող հետքեր չկային: Միայն սպանության եղանակն էր առանձնանում: Մինչև անգամ աղջիկներ են եղել կասկածյալների շրջանակում, օրինակ՝ թեքվոնդոյով զբաղվող մի մարզուհի: Բայց երբ ի վերջո սպանությունը բացահայտվել է, պարզվել է, որ 26-ամյա Դավիթ Թամրազյանը հենց մսագործ է…
Տուժողը մատուցողուհի է եղել տարբեր օբյեկտներում: Վարել է ազատ կենսակերպ: Դավիթը որոշ ժամանակ նրա հետ ինտիմ կապ է ունեցել: Հետո թողել է: Ուրիշ աղջկա հետ ավելի լուրջ ընկերություն է արել:
Տուժողը չի հաշտվել Դավիթի հեռացման հետ ու կռիվներ է սարքել, վիրավորական արտահայտություններ արել Դավիթի, նրա ընկերուհու հասցեին, մինչև անգամ վերջինիս հետ հանդիպել ու բռնություն է գործադրել…
Առաջադրված մեղադրանքի համաձայն՝ Դավիթ Թամրազյանն իր վերջին այցը տուժողի վարձակալած բնակարան կատարել է հենց նրա հայհոյանքներից ու կռիվներից «անձնապես վիրավորված»:
Նա տուժողին ներկայացրել է, թե իրենց հարաբերությունները վերականգնելու, նվեր մատուցելու համար է այցելում: Բայց իրականում գրպանում ուներ այն դանակը, որով մսագործի արագաշարժությամբ միանգամից կտրել էր տուժողի պարանոցը:
Տուժողը մերկացել էր, փակել էր աչքերը՝ «սյուրպրիզի» ակնկալիքով, երևի չէր էլ հասկացել, թե ինչպես կտրվեց իր բուռն «կյանքի թելը»…
Մարդն իր վարքագծով ու չարդարացված ինքնավստահությամբ երբեմն մոտեցնում է իր վախճանը, իսկ ճակատագրի «սյուրպրիզը» հաճախ պարզապես բխում է մարդու ապրելակերպից…
