ՆԱՏՕ-ն սկսել է համացանցում քարոզչությամբ զբաղվել՝ Twitter-ում ստեղծելով տեղեկատվական աջակցման կառուցվածք: Այս մասին հայտնում է BBC-ն:
ՆԱՏՕ-ի արագ արձագանքման կորպուսին կից հատուկ խումբ է ստեղծվել: Հաղորդվում է, որ Հյուսիսատլանտյան դաշինքի հրամանատարությունը վարձել է Մեծ Բրիտանիայի առաջատար գովազդային ընկերություններից մեկը՝ M&C Saatchi-ը, քարոզչության իրականացման և հակառակորդի տեղեկատվական հարձակումներին դիմակայելու համար:
Ընկերության մասնագետները խորհրդատվություն են տրամադրում ռազմական մասնագետներին, թե ինչպես վախեցնել հակառակորդին, առաջին հերթին դրա ղեկավարությանը, նաև ինչպես սեփական տեսակետը հասցնել մարտական գործողությունների գոտիների բնակչությանը:
«Ժամանակակից պատերազմում հաղորդակցության միջոցները գնալով ավելի կարևոր են դառնում»,- BBC-ն մեջբերում է արագ արձագանքման կորպուսի հրամանատար, գեներալ-լեյտենանտ Թիմոթի Էվանսի խոսքերը: Նա խոստովանել է, որ ՆԱՏՕ-ի հակառակորդները կարողանում են Twitter-ի միջոցով ավելի լավ քարոզչություն իրականացնել:
Տեղեկատվական նոր կառուցվածքի մարտական պատրաստության առաջին ստուգումը տեղի է ունեցել օրերս ՆԱՏՕ-ի զորավարժությունների ժամանակ: Սցենարը ենթադրում էր կորպուսի կողմից մարտական գործողությունների անցկացում ընդդեմ զինված խմբավորումների, որոնք զավթել են արտասահմանյան երկրներից մեկում խոշոր նավթային օբյեկտները: