Կառավարության նիստում Արդարադատության նախարար Դավիթ Հարությունյանը ներկայացրեց «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» ՀՀ օրենքում փոփոխություն կատարելու մասին» օրենքի նախագիծը, որը ներկայացրել է «Ծառուկյան» խմբակցությունը:
Նախարարի խոսքով՝ այն վերաբերում է տրասնպորտային միջոցների վարձույթով զբաղվող իրավաբանական անձանց պատասխանատվությանն այն դեպքում, երբ տրանսպորտային միջոցի վարձակալը կատարում է ճանապարհային երթևեկության կանոնների խախտում, որը ֆիքսվում է տեսանկարահանող սարքերով:
«Այլ անձանց դեպքում նախատեսվում է պատասխանատվություն մեքենաների սեփականատերերի համար միմիայն այն դեպքում, եթե նրանք չեն ապացուցել, որ ղեկին գտնվել է այլ անձ: Այս կազմակերպությունների համար կարգավորումը այլ է, և եթե մեկամսյա ժամկետում չի հաջողվում գանձել վարորդից, ապա պատասխանատվություն կրում են նաև կազմակերպությունները», – նշեց Դավիթ Հարությունյանը:
Նախարարը նշեց, որ պատգամավորներն առաջարկել են փոխել այս դրույթը և տարածել ստանդարտ կանոնը: Սա, ըստ Դավիթ Հարությունյանի, ողջամիտ առաջարկություն է, սակայն նա առաջարկեց ձեռնպահ մնալ այս նախաձեռնությունից՝ հաշվի առնելով այն հանգամանքը, որ մոտակա երկու շաբաթվա ընթացքում ԱԺ է ներկայացվելու իրավախախտումների նոր օրենսգիրք, որը կարգավորելու է այս հարցը:
