Հայ-թուրքական հարաբերությունների կարգավորման վերաբերյալ խոսակցությունները Թուրքիայում ակտիվացել են հատկապես ԱԳ նախարար Ահմեդ Դավութօղլուի՝ հոկտեմբերին Շվեյցարիա կատարած այցից հետո:
«Առաջին լրատվական»-ի հետ զրույցում այս մասին ասաց Ստամբուլում հրատարակվող «Ժամանակ» թերթի խմբագիր Արա Գոչունյանը՝ հավելելով, որ թեմայի շուրջ թուրքական մամուլը չափավոր անդրադարձ է կատարել, այսինքն՝ չի կարելի ասել, որ այս ընթացքում հայ-թուրքական հարաբերությունների կարգավորման թեման թուրքական ԶԼՄ-ներին հետաքրքրող առաջնային թեմա է եղել:
«Հայաստանի և Թուրքիայի նախագահներ Սերժ Սարգսյանի և Իլհամ Ալիևի՝ օրերս Վիեննայում կայացած հանդիպմանը՝ Ղարաբաղյան հարցի շուրջ երկխոսությունը շարունակելու ֆոնին, թուրքական կողմը, ըստ երևույթին, ցանկություն ուներ միջազգային հանրության աչքում Հայաստանի հետ հարաբերությունների կարգավորման պատկերացումները թարմացնել»,- ասաց նա:
Արա Գոչունյանի խոսքով՝ պատահական չէր, որ Վիեննայում կայանալիք հանդիպումից անմիջապես առաջ Ադրբեջանի նախագահն այցելել էր Անկարա: «Դրական փոփոխություններ չպետք է ակնկալել ո՛չ Ադրբեջանի պահվածքի մեջ, ոչ էլ հայ-թուրքական հարաբերությունները Ղարաբաղյան հարցով պայմանավորող Թուրքիայից: Այս համատեքստում շոշափելի իրադարձությունների ակնկալիքներ չպետք է ունենալ: Ադրբեջանը հայ-թուրքական հարաբերությունների հարցի շուրջ իր վերաբերմունքը վաղուց է արտահայտել»,- ասաց Արա Գոչունյանը:
«Ժամանակ» թերթի խմբագրի համոզմամբ՝ Թուրքիան մտադիր չէ Հայաստանի հետ հարաբերությունները կարգավորել առանց Ադրբեջանի հետ համաձայնության գալու: «Այս ֆոնի վրա ի՞նչ պետք է ակնկալել հարաբերությունների կարգավորման մասով: Ճիշտ է, հայ-թուրքական հարաբերությունների լավացման մասին խոսակցություններ վերջին շրջանում շատ ենք լսում, սակայն խոսքը գործի վերածելու պատրաստակամությունը բացակայում է, դրա շոշափելի հիմքեր, ըստ երևույթին, չկան»,- ամփոփեց Արա Գոչունյանը:
Հիշեցնենք, որ Թուրքիայի արտաքին գործերի նախարար Ահմեդ Դավութօղլուն հայ-թուրքական արձանագրությունների ստորագրման օրը՝ հոկտեմբերի 10-ին, Բեռնում հանդիպում ունենալով իր շվեյցարացի գործընկերոջ հետ, հայտարարել էր, որ հայ-թուրքական արձանագրությունները կվավերացվեն միայն Ղարաբաղի խնդրի կարգավորումից հետո:
Ավելի ուշ Դավութօղլուն մեկնել էր ԱՄՆ: ԱՄՆ պետքարտուղար Ջոն Քերրի հետ հանդիպման ժամանակ, ի թիվս այլ հարցերի, անդրադարձ էր կատարվել Ղարաբաղյան խնդրի կարգավորման խնդրին: Թուրքիայի ԱԳ նախարարը հույս էր հայտնել, որ սառեցված հակամարտությունը շուտով կլուծվի, ինչը խաղաղություն կբերի Կովկասին:
