Սաուդյան Արաբիայի արևելքում՝ Իրաքի և Քուվեյթի հետ սահմանամերձ տարածքում ընկել է վեց ականանետային ռումբ՝ հաղորդում է «Ալ-Հայաթ» արաբական թերթը:
Բանակային աղբյուրների տվյալներով՝ պատահարը տեղի է ունեցել երեկ, զինվորականները չեն կարողացել որոշել այն շրջանը, որտեղից արձակվել են ռումբերը: Հաղորդվում է, որ տուժածներ չկան:
Ավելի ուշ իրաքյան «Մուխթարի բանակ» խմբավորումը ստանձնել է ականանետային հարձակման պատասխանատվությունը:
Իրաքցի շիաները հայտարարության մեջ նշել են, որ այս հարձակումը պետք է գնահատվի որպես նախազգուշացում: «Սաուդացիները պետք է հասկանան, որ իրենց սահմանային զորամասերը և պարեկները գտնվում են մեր կրակի գոտում»,- նշել են ծայրահեղականները:
Նրանց խոսքերով՝ իրենց նպատակն է հասնել այն բանին, որպեսզի Սաուդյան Արաբիան դադարի միջամտել Իրաքի ներքին գործերին: Բացի այդ «Մուխթարի բանակ»-ի առաջնորդները նշել են, որ պատրաստվում են վրեժ լուծել Էր-Ռիադից «Մուհամմեդ մարգարեի դստերը հասցրած վիրավորանքի համար»: Նրանք չեն հստակեցրել, թե սաուդացիների որ խոսքերն են վիրավորել շիաներին:
