«Ես որքանով հիշում եմ՝ Վանաձորի, Լոռու մարզի սոցիալ-տնտեսական զարգացման մի քանի ծրագրեր կային մշակված նախկինում, նախորդ մարզպետերի և կառավարության ղեկավարների կողմից։ Վարչապետը նոր ռազմավարություն մշակելուց առաջ լավ կաներ ասեր, թե որքանով են ստացվել կամ ձախողվել նախորդ ծրագրերը»,- ասաց Հելսինկյան քաղաքացիական ասամբլեայի Վանաձորի գրասենյակի պատասխանատու Արթուր Սաքունցը՝ անդրադառնալով 2017-2025 թթ. Լոռու մարզի զարգացման ռազմավարությանը, որը շաբաթ օրը ներկայացվել է վարչապետին։
Իրավապաշտպանի խոսքերով՝ չգիտես ինչու, այս իշխանությունները մշտապես առաջնորդվում են «ջնջենք, զրոյից սկսենք» սկզբունքով, որը միշտ չէ, որ արդյունավետ է։ «Չի բացառվում, որ մի ամիս հետո նոր վարչապետ կգա և նորից կփոխի այդ ամենը, նոր ռազմավարություն կներկայացնի։ Մեր երկրում ռազմավարությունները պայմանավորված են ոչ թե ինստիտուցիոնալ մոտեցումներով, այլ անձնական մոտեցումներով։ Դրա համար անձի փոփոխությամբ փոփոխվում են նաև ռազմավարությունները»,- ասաց Սաքունցը։
Ըստ իրավապաշտպանի՝ վերջին 6 տարվա ընթացքում Վանաձորի աշակերտների թիվը կրճատվել է 45 տոկոսով, 3 դպրոց փակվել է, կրճատվել է մանկապարտեզների թիվը, գործարանները փակվել են, քիմիական հսկա գործարանները չեն վերապրոֆիլավորվել։ «Այս բոլոր տվյալները փաստում են, որ ներդրումները չեն կարող հոսել այնտեղ, որտեղ ներդրումային միջավայր չկա։ Ընդ որում պետք չէ տարածքային բաժանումներ անել՝ Վանաձոր, Գյումրի։ Բոլոր տեղերում էլ նույն պատկերն է։ Քաղաքականությունը պետք է փոխել։ Բազմաթիվ գործոններ կան, որոնք տեղային նշանակություն չունեն, ունեն համապետական նշանակություն։ Իսկ երբ համապետական նշանակություն ունեցող խնդիրները չեն լուծվում, մարզում տարաժամկետ ռազմավարություն մշակելը դառնում է «Նյու Վասյուկիի» ծրագիր, որը բացարձակապես ռեալ բովանդակություն ունենալ չի կարող»,- նշեց մեր զրուցակիցը։
Առավել մանրամասն՝ տեսանյութում։
