«Սահմանադրության մեջ Վահե Գրիգորյանի մատնանշած թերությունները չգիտակցված են, քանի որ, նախ Սահմանադրության նախագծի մշակման հարցում չապահովվեց մասնակցային գործընթաց, ինչպես նաև ցուցաբերվեց անհարկի շտապողականություն»,- «Առաջին լրատվական»-ի հետ զրույցում ասաց իրավապաշտպան Արթուր Սաքունցը՝ անդրադառնալով փաստաբան Վահե Գրիգորյանի դիտարկումներին։
Նշենք, որ ըստ Վահե Գրիգորյանի՝ Ազգային ժողովը չունի Հանրապետության 4-րդ նախագահին ընտրելու լիազորություն, քանի որ այդ լիազորությունը նախատեսված է միայն գործող Սահմանադրության 125 հոդվածում, որը դեռ ուժի մեջ չէ: Այն ուժի մեջ կմտնի Հանրապետության 4-րդ նախագահի պաշտոնի ստանձնման օրը: Այսինքն՝ չորրորդ նախագահը նույնպես պետք է ընտրվի ուղիղ քվեարկության միջոցով՝ գործող Սահմանադրության համաձայն։
«Սերժ Սարգսյանը շատ էր շտապում, որ խաղի կանոնները փոխվեին և չլիներ այլևս նախագահի ուղիղ ընտրություն, բայց տեսնում ենք, որ, այնուամենայնիվ, իներցիոն մտածողությունը հաղթահարել է, և փոփոխության տրամաբանությունը չի կարողացել գերիշխող լինել»,- ասաց Սաքունցը՝ հավելելով, որ հիմա իշխանության տարբեր շրջանակներից փորձ կանեն լղոզելով աղավաղել նաև Սահմանադրությունը։
Իրավապաշտպանի խոսքերով՝ սա լավ առիթ կարող է հանդիսանալ, որպեսզի ընդդիմադիր քաղաքական ուժերը ցույց տան իրենց դիրքորոշումը։ «Սա յուրօրինակ ինդիկատոր է, որով կբացահայտվեն իրապես քաղաքական ուժերը։ Պարզ կդառնա՝ նրանք իսկապես ուզում են երկրում վերացնել սահմանադրական ճգնաժամը, թե հերթական անգամ կհարմարվեն Սերժ Սարգսյանի ձևավորած համակարգում գոյատևելուն»,- նկատեց Արթուր Սաքունցը։
Առավել մանրամասն՝ տեսանյութում։
