Գերմանիայի իշխանությունները որոշում են կայացրել համացանցում հրապարակել 25 արժեքավոր նկարների լուսանկարները, որոնք, հավանաբար, 1930-ականներին առգրավվել էին նացիստների կողմից և 2012-ին հայտնաբերվել մյունխենցի 80-ամյա հավաքորդ Կոռնելիուս Գուրլիտի բնակարանում: Այս մասին երեկ համատեղ հայտարարությամբ հաղորդել են Գերմանիայի ֆինանսների և Բավարիայի դաշնային հողերի արդարադատության ու մշակույթի նախարարությունները՝ հայտնում է ITAR-TASS-ը:
Խոսքը ահռելի գտածոյի՝ դասական մոդեռնիզմի նկարիչների շուրջ 1500 կտավների մասին է, որը նացիստական Գերմանիայում համարվում էր գերմանական գաղափարախոսությանը հակասող «դեգեներատ» արվեստ:
Այն ժամանակ նկարները, որպես կանոն, առգրավվում էին դրանց տերերից: Հայտնաբերվել էին Պաբլո Պիկասոյի, Մարկ Շագալի, Անրի Մատիսի, Էմիլ Նոլդեի գործերը, որոնց ընդհանուր արժեքը մոտ 1 մլրդ եվրո է:
Արվեստի գործերի մի մասը հրապարակվել է www.lostart.de կայքում:
