ԱԺ «Ծառուկյան» դաշինք խմբակցությունը խորհրդարան էր ներկայացրել Ընտրական օրենսգրքում փոփոխություններ կատարելու մասին օրենսդրական նախաձեռնություն, որը քննարկվել էր։ ԱԺ «Ծառուկյան» դաշինքի այս նախաձեռնությունը պետք է քննարկվեր ԱԺ պետաիրավական հարցերի հանձնաժողովում, սակայն պատգամավոր Նաիրա Զոհրաբյանը հանձնաժողովի նիստում հայտարարել էր, որ իրենք հանձնաժողովի և կառավարության հետ եկել են համաձայնության՝ աշխատել համատեղ և ներկայացնել միասնական նախագիծ, ներառելով նաև ԵԱՀԿ ժողովրդավարական հաստատությունների և մարդու իրավունքների ինստիտուտի գրասենյակի առաջարկությունները։
«Առաջին լրատվական»-ը «Ծառուկյան» դաշինք խմբակցության քարտուղարից հետաքրքրվեց՝ արդյո՞ք կառվարության նախագծի շուրջ կոնսենսուսի կգան, քանի որ կառավարությունը 2018-ին բացասական եզրակացություն էր տվել «Ծառուկյան» խմբակցության պատգամավորների կողմից ներկայացված նախագծին։ Վահե Էնֆիաջյանը ընդգծեց, որ միչև երկու ամիս ժամանակահատվածում կուսումնասիրեն ամբողջական փաթեթը և հանդես կգան վերջնական մոտեցումներով։ Նրա դիտարկմամբ՝ այսօրեական մոտեցում դեռևս չկա։
Պատգամավորը հիշեցրեց, որ առաջարկում են ընտրությունները անցկացնել պարզ համամասնական ընտրակարգով, երբ կուսակցությունները կամ դաշինքները հանդես են գալիս 100 տոկոս համամասնական ցուցակով, ըստ նրա՝ ներկայիս ընտրակարգը անընդունելի է։
Անդրադառնալով հարցին, թե եթե անընդունելի է՝ ինչ էր խանգարում ժամանակին ԲՀԿ խմբակցությանը դեմ քվեարկել Ընտրական օրենսգրքին, քանի որ այս համակարգը ձևավորվել է քաղաքական ուժերի համաձայնությամբ, այդ թվում՝ ԲՀԿ-ի, Վահե Էնֆիաջյանն ասաց, որ ռեյտինգային համակարգի հետ կապված իրենք մտահոգությունները դեռ այն ժամանակ հայտնել են։
«Քանի որ կային այլ կարծիքներ, այլ մոտեցումներ, և քանի որ մենք թիմային մոտեցումներով ենք առաջնորդվում, քննարկեցինք և նման որոշում ընդունեցինք։ Բայց կիրառության մեջ լրիվ այլ դրսևորումներ ունեցավ և, այս ամենին, որպես հետևություն, Ընտրական նոր օրենսգիրք ենք առաջ քաշում»,- շեշտեց նա։
Մանրամասները՝ տեսանյութում։