Եկատերինբուրգում ոստիկանները հերթական անգամ ընդհատել են քրեական հեղինակությունների «գործարար զրույցը» սրճարաններից մեկում: Այսպես կոչված՝ հավաքի վեց մասնակիցներ տեղափոխվել են ոստիկանության բաժանմունք, իսկ ահա ևս մեկին՝ հունվարին սպանված Ասլան Ուսոյանի զարմիկ Թիմուր Միրզոևին (Թիմուր Սվերդլովսկի), տարել են շտապօգնության մեքենայով: Այս մասին հայտնում է Vesti-ն:
Սրճարանի բոլոր այցելուների մոտ ոստիկանները հայտնաբերել են սառը զենք: Իրավապահները վստահ են, որ այդ հաստատությունում քրեական հեղինակություններ էին հավաքվել:
Ռուսաստանի ՆԳՆ Քրեական հետախուզության գլխավոր վարչության Կազմակերպված հանցավորության դեմ պայքարի Սվերդլովի բաժնի պետ Կոնստանտին Ստրոգանովի խոսքով՝ այդ հավաքին քննարկվել են ազդեցության ոլորտների հարցերը: Նա հստակեցրել է, որ խոսքը մասնավորապես իրենց և հարևան Չելյաբինսկի մարզերի մասին է:
Իրենց «օրենքով գող» անվանող տղամարդկանց շարքում ոստիկանները ճանաչել են քրեական հեղինակություն Թիմուր Միրզոևին: Ենթադրաբար մի քանի տարի առաջ Դեդ Հասանն իր հարազատին Սվերդլովի մարզի «նայող» է նշանակել: Ձերբակալման պահին նրա սիրտն անսպասելիորեն վատացել է: Ստիպված են եղել շտապօգնություն կանչել: Ժամանած բրիգադը նրան տեղափոխել է մոտակա հիվանդանոց:
Սրճարանի մոտ իրենց տերերին էին սպասում բացառապես «լյուքս» դասի ավտոմեքենաները: Մի քանի մեքենաներում ոստիկանները հայտնաբերել են դանակներ, տրավմատիկ ատրճանակներ և սպիտակ փոշով լի փաթեթներ:
Ինչպես երևում է՝ քրեական աշխարհի ներկայացուցիչների համար Ուրալն ինքնատիպ Մեքքա է դարձել: Միրզոևն արդեն առաջին անգամ չէ այստեղ հավաքում իր կողմնակիցներին: Մի քանի ամիս առաջ ոստիկանները ձախողել այդպիսի ևս մեկ հանդիպում:
ԶԼՄ-ների փոխանցմամբ՝ քրեական աշխարհի ներկայացուցիչներն, ըստ ամենայնի, հավաքվել էին մեկ խմբավորման թևի տակ միավորելու Չելյաբինսկի և Սվերդլովի մարզի քաղաքները: Որոշ տվյալներով՝ մասնավորապես նրանց հետաքրքրել է Տրոիցկ քաղաքը: Այն գտնվում է Ղազախստանի հետ սահմանին և համարվում է Ռուսաստան թմրանյութերի ներկրման և մաքսանենգության խոշորագույն ուղի: Սակայն քաղաքում արդեն մի քանի տարի գործել է մեկ այլ հանցավոր խմբավորում, որի առաջնորդներն են եղբայրներ Արտյոմ և Ստանիսլավ Զայցևները: Նրանք իբր թե նույնպես բարձր հովանավորներ են ունեցել:
Թե ինչով կվերջանա Ուրալում ազդեցության գոտիների բաժանման փորձերը՝ բարդ է ասել: Կլանների ներկայացուցիչների գրեթե յուրաքաչուր նոր հանդիպում ավարտվում է ձերբակալություններով: Նրանց գործարար բանակցություններին գրեթե միշտ միջամտում են իրավապահ մարմինները:
