Սերժ Սարգսյանն այսօր ըստ էության պաշտոնապես ներկայացրեց Հայաստանի չորրորդ նախագահի թեկնածուին, ինչպես նախօրեին ՀՀԿ ԳՄ նիստից հետո ազդարարել էր կուսակցության խոսնակը: Այդ թեկնածուն Արմեն Սարգսյանն է՝ Մեծ Բրիտանիայում Հայաստանի դեսպանը, Հայաստանի նախկին վարչապետը: Սակայն Սերժ Սարգսյանի հետ նրա զրույցը գոնե ֆորմալ առումով հիմք չի տալիս խոսելու պաշտոնական առաջադրման մասին:
Բանն այն է, որ Արմեն Սարգսյանը Սերժ Սարգսյանից ժամանակ է խնդրում վերջնական որոշման համար: Սերժ Սարգսյանն էլ նրան հորդորում է հանդիպել թե՛ խորհրդարանական ուժերին, թե՛ հասարակական ամենատարբեր շերտերի ներկայացուցիչներին: Այդ ցանկությունը հայտնել է նաև Արմեն Սարգսյանը՝ ասելով, որ կցանկանար հանդիպել անգամ Արցախի իշխանությանը, վերջնական որոշումից առաջ:
Այս ամենով հանդերձ՝ հարցը, թե արդյո՞ք կլինի Արմեն Սարգսյանը Հայաստանի չորրորդ նախագահ և նախագահի թեկնածու, թվում է թերևս ավելորդ, և ներկայումս ավելի հետաքրքիր է դառնում հարցը, թե արդյոք Հայաստանում կլինի՞ Սարգսյանների «եռապետություն», թե՞ ոչ:
Խոսքն այն մասին է, թե արդյոք Արմեն Սարգսյանին առաջ քաշելով չորրորդ նախագահի պաշտոնին՝ Սերժ Սարգսյանն այդպիսով իր ճանապա՞րհն է հարթում դեպի վարչապետի պաշտոն՝ ուղղակի թե անուղղակի: Եթե Սերժ Սարգսյանն էլ առաջադրվի վարչապետի պաշտոնի համար, ակամա կառավարման խորհրդարանական մոդելի պարագայում կստացվի ուշագրավ պատկեր՝ իշխանության երեք առանցքային դիրքերում՝ վարչապետ, նախագահ, պաշտպանության նախարար, կլինեն Սարգսյաններ:
Զուտ «սիմետրիայի» տեսանկյունից այս ամենն իհարկե ուշագրավ է, և հազիվ թե Սարգսյան ազգանունը լրջորեն լինի որոշումների կայացման կողմնորոշիչ, սակայն այդուհանդերձ հենց այդ տեսանկյունից հետաքրքիր է, թե կխախտվի՞ արդյոք այդ սիմետրիան, ու «սեպ կխրվի՞» Սարգսյանների հնարավոր «եռապետության» մեջ:
Մյուս հարցը, որ առկա է Սարգսյանի առաջադրման համատեքստում՝ Արմեն Սարգսյանի, դա այն է, թե արդյոք նրա խորհրդարանական ընտրությունը կանցնի՞ մեկ փուլով, և Արմեն Սարգսյանը կարժանանա՞ «Ծառուկյան» դաշինքի սատարմանը: Ընդ որում, այստեղ հնարավոր է թերևս նվազագույնը երկու տարբերակ, երբ դաշինքը պաշտոնապես սատարի Արմեն Սարգսյանին՝ դա մի ներքաղաքական կամ ներիշխանական ինդիկատոր և իրավիճակ է, և երբ դաշինքը պաշտոնապես հայտարարի իր պատգամավորներին, այսպես ասած, «ազատ քվեարկության» իրավունք տալու մասին: Դա արդեն բոլորովին այլ ներքաղաքական կամ ներհամակարգային իրավիճակ է: Ընդ որում այս մասով թերևս կա փոքր, բայց նուրբ ինտրիգ՝ կապված Արմեն Սարգսյանի հանդիպումների հետ, մասնավորապես՝ «Ծառուկյան» դաշինքի հետ հանդիպման:
Դաշինքը դեռևս չի որոշակիացրել իր վերաբերմունքը նախագահի հարցում: Որոշակիացումը կլինի մինչև Արմեն Սարգսյանի հե՞տ հանդիպումը, թե՞ դրա արդյունքում: Որովհետև գոնե այս մասով իրավիճակը կարող է ամենևին չլինել ձևական, և թե՛ իրավիճակային, թե՛ հետագա ներիշխանական բալանսի կամ ներհամակարգային բալանսի մասով ուշագրավ լինի հանգամանքը, թե ո՞ւմ հետ է «Ծառուկյան» դաշինքը ավելի շատ եկել համաձայնության նախագահի հարցում՝ Սերժ Սարգսյանի՞, թե՞ Արմեն Սարգսյանի:
