ԼՂՀ ԱԺ պատգամավոր Վահան Բադասյանը դիմել է Սերժ Սարգսյանին` ճշգրիտ թվարկելով այն բոլոր «ձեռքբերումները», որոնք արձանագրվել են Հայաստանում` նրա ղեկավարության օրոք. «Այսօր ունենք մի իրավիճակ, որն էապես սպառնում է Հայաստանի ու Արցախի անվտանգությանը՝ ինչի մասին հատկապես վկայեց Մաքսային միության Մինսկի գագաթնաժողովը, ցույց տալով, որ այդ միության անդամների համար Հայաստանը ոչ թե սպասված գործընկեր է, այլ շանտաժի և քաղաքական առևտրի առարկա՝ Արցախի խնդրով հանդերձ:
Մենք ունենք ֆուտբոլային տապալված դիվանագիտություն, ունենք Հայաստանի ինքնիշխանության խոսուն սպառնալիքներ, ունենք ժողովրդագրական լրջագույն խնդիր՝ մեծ ծավալների հասնող արտագաղթ, հասարակության բարոյահոգեբանական անկումային վիճակ, մտավորական, գիտական պոտենցիալի սոցիալ-հոգեբանական անմխիթար կեցություն, ունենք հայրենի բնության հանդեպ անխնա և անտարբեր վերաբերմունք՝ հանուն մի խումբ անձանց գերշահույթների, ինչը բերել է Հայաստանում բնական միջավայրի հանդեպ լուրջ սպառնալիքի և բնակչության ու սերունդների առողջությանը սպառնացող վտանգների, ունենք օրենքի հանդեպ խտրական վերաբերմունք՝ երբ Ձեր շրջապատի շատ անձինք հանցագործություններ են կատարում և իրենք էլ որոշում իրենց պատժելիության կամ ավելի ճիշտ` անպատժելիության աստիճանը: Այդ ամենի հետևանքով, Հայաստանն ու Արցախը ներկայում մեծ վտանգի առաջ են»:
Չնայած այս տագնապահարույց իրողությունների թվարկմանը` Վահան Բադասյանը նաև համոզված է Սերժ Սարգսյանի` «Հայաստանի ու Արցախի ապագայի հանդեպ անկեղծ մտահոգության հարցում», և քանի որ համոզված է` նրան «խոհեմության և հրաժարականի կոչ է անում»: