Հոկտեմբերի 26-ին տեղի է ունեցել վերածնված ՀՀՇ կուսակցության հիմնադիր համագումարը, որի նախաձեռնողներից է նաև ԱԺ նախկին փոխնախագահ Կարապետ Ռուբինյանը: Նա պատասխանեց «Առաջին լրատվական»-ի հարցերին:
– Պարոն Ռուբինյան, Հայաստանում, որտեղ բոլոր քաղաքական կուսակցությունները վարկաբեկված են, ինչպե՞ս պետք է հանրության մոտ վստահություն ձեռք բերել:
– Իհարկե, դժվար է, երբ քաղաքական դաշտ ընդհանրապես չկա, և այս վիճակում նոր կուսակցություն ստեղծելը խնդրահարույց է, բայց դուք գիտեք հանգամանքները: Պարզապես շատ մեծ անարդարություն, մեքենայություններ եղան ՀՀՇ-ի հետ կապված, և մենք մեր պարտքը համարեցինք չհամաձայնվել դրա հետ, որովհետև սա պատմության խեղաթյուրում էր: Իմ կարծիքով՝ այս քայլն ուղղված է պատմական ճշմարտությունը վերականգնելուն, իսկ քաղաքական դաշտի բացակայությունը կամ խեղաթյուրվածությունը կլինի մեր պայքարի առարկան, թե որքանով կհաջողվի, դուք կտեսնեք:
– Կոնկրետ ՀՀՇ-ի նկատմամբ հանրության շրջանում նույնպես կա անվստահություն, այն, որ վերջին տարիներին կարծես անգործության էր մատնված: Ինչպե՞ս պետք է վերականգնեք:
– Մեր ամբողջ գործունեությունն ուղղված է լինելու դրան, թե ինչ հաջողության կհասնենք, հիմա չեմ կարող կանխատեսել, բայց ամեն ինչ անելու ենք դրա համար:
– Կարծում եք` այսօր ինքնուրույնությունը կորցնելու վտանգի առա՞ջ ենք կանգնած:
– Այո, ինքնակոչ նախագահը ինքնակոչ գործունեությամբ է զբաղված, որը ուղղակի վտանգում է մեր երկրի ինքնիշխանությունը:
Ամբողջական զրույցը՝ տեսանյությում:
