«Այս տարի Լևոնը ֆանտաստիկ շախմատ է ցուցադրում և հաղթող է դարձել մի շարք հեղինակավոր մրցաշարերում: Նա արժանի էր նվաճել աշխարհի գավաթը: Կարելի է ասել, որ այս նվաճումը 2017 թվականի ամփոփումն էր հայ շախմատիստի համար:
Լևոնի կարիերայում ծանր ժամանակներ են եղել, բայց աշխարհի գավաթի խաղարկությունում հաղթանակը ապացուցում է, որ նա սուպերգրոսմայստեր է և պատրաստ է հաղթահարել ցանկացած դժվարություն թե՛ սպորտում և թե՛ կյանքում: Բոլոր պարտիաներում Լևոնը մեծ ճնշում է գործադրում: Նրա պարտիաները ուսանելի են շատ գրոսմայստերների համար: Անկեղծ ուրախ եմ հայ շախմատիստի հաջողության համար: Շնորհավորում եմ, սիրելի Լևոն, փայլուն հաղթանակի և աշխարհի չեմպիոնի կոչման հավակնորդների մրցաշարի ուղեգիրը նվաճելու առթիվ»,- «Ռ-սպորտ» հեռուստաընկերության թղթակցի հետ զրույցում ասել է աշխարհի փոխչեմպիոն Սերգեյ Կարյակինը, ով 2015 թվականին Բաքվում տեղի ունեցած աշխարհի գավաթի խաղարկության հաղթողն է:
Ավելի վաղ մեկնաբանելով Արոնյանի ելույթը՝ ՖԻԴԵ-ի նախագահ Կիրսան Իլյումժինովը, շնորհավորելով Հայաստանի նախագահ Սերժ Սարգսյանին, հայտարարել էր, որ Հայաստանն արդեն իսկ ունի նոր Տիգրան Պետրոսյան, ով պատրաստ է նվաճելու աշխարհի չեմպիոնի կոչումը: «Վստահ եմ, որ հավակնորդների մրցաշարում հայ գրոսմայստերը կկարողանա բարձր արդյունք ցույց տալ»,- նշել էր Իլյումժինովը:
Ռուսաստանցի մեկ այլ գրոսմայստեր՝ Սերգեյ Շիպովն էլ, ով մեկնաբանում էր աշխարհի գավաթի խաղարկության պարտիաները, շտապել է հայտարարել, որ Արոնյանը հավակնորդների մրցաշարի ֆավորիտն է: «Լևոնը մրցաշարի հաղթողի կոչման իրական հավակնորդ է: Նշեմ, սակայն, որ հավակնորդների նախորդ մրցաշարերում Արոնյանին «քաշել է» նյարդային համակարգի թուլությունը: Ինտրիգը հետևյալն է. կկարողանա՞ արդյոք Արոնյանը զսպել էմոցիաները և խաղալ այնպես, ինչպես խաղում է գերմրցաշարերում: Եթե նա գոնե խաղա իր հնարավորությունների սահմանում, կարծում եմ՝ կնվաճի հաղթողի կոչումը»- ասել է Շիպովը:
Նշենք, որ հաղթելով Թբիլիսիում տեղի ունեցած աշխարհի գավաթի խաղարկությունում՝ Լևոն Արոնյանը պատմական արդյունք է գրանցել: Մասնավորապես, մեր շախմատիստը միակն է աշխարհում, ում հաջողվել է դառնալ աշխարհի գավաթի խաղարկության կրկնակի գավաթակիր: Հիշեցնենք, որ Արոնյանը աշխարհի գավաթը նվաճել էր նաև 2005 թվականին: Ու փաստորեն պատմական այս դուբլից հետո բոլորս իրական ենք համարում և սպասում ևս մեկ պատմական դուբլ. աշխարհի գավաթակիր՝ գումարած աշխարհի չեմպիոն:
Նշենք, որ աշխարհի գործող չեմպիոն Մագնուս Կարլսենին չի հաջողվել նվաճել աշխարհի գավաթը: «Բոլոր ուժեղագույն շախմատիստների նպատակը աշխարհի չեմպիոն դառնալն է: Իմ նպատակը՝ նույնպես: Այդ իմաստով ինձ համար այս մրցաշարը շատ լարված էր, և ես հպարտ եմ, որ կարողացա այս լարվածությանը դիմանալ և հաղթող դառնալ, նվաճել հավակնորդների մրցաշարի ուղեգիր: Ինձ համար մեծ հպարտություն է, որ իմ խաղը համեմատում են մեծ շախմատիստ Տիգրան Պետրոսյանի խաղին: Ես միշտ փնտրել եմ մոտ ճանապարհներ, որ նմանվեմ նրան իմ խաղաոճով, բայց միշտ չի ստացվել, քանի որ նա հանճարեղ շախմատիստ էր, իսկ ես մի փոքր ավելի տաքարյուն եմ: Բայց նպատակս հենց դա է՝ նմանվել նրան: Ես եղա Ռուսթավելիում, այն տան բակում, որտեղ ապրել է Տիգրան Պետրոսյանը: Ինձ համար դա միստիկական պահ էր: Միշտ հետաքրքիր է ինձ համար, թե մեծ շախմատիստները որտեղ են ապրել, ինչ տներում են ապրել: Հիշում եմ՝ երբ 15-16 տարեկան էի, Փարիզում գնացի իմ սիրած շախմատիստի՝ Ալյոխինի գերեզման: Ինձ համար դրանք հատուկ պահեր են: Միշտ փորձում եմ լինել նման վայրերում, եթե հնարավոր է լինում: Կրկին անգամ նշեմ, որ Թբիլիսիում տեղի ունեցած մրցաշարում ինձ համար կարևորը հավակնորդների մրցաշարի ուղեգիրն էր»,- ասել է Արոնյանը:
Վերջինիս խոսքը կրկին անգամ վկայում է աշխարհի չեմպիոն դառնալու երազանքի մասին: Նշենք, որ Աշխարհի գավաթը նվաճելուց հետո Արոնյանը ՖԻԴԵ-ի դասակարգման աղյուսակում այս պահին երկրորդն է: Առաջին հորիզոնականում շարունակում է մնալ Կարլսենը: Աշխարհի չեմպիոնի հավակնորդների մրցաշարը տեղի կունենա եկող տարվա մարտին:
