«Հոգևոր Հայաստան» նախաձեռնության աջակից, «Ղարաբաղ» կոմիտեի անդամ Աշոտ Մանուչարյանը իրական օրակարգից դուրս է համարում անազատության մեջ գտնվող Ժիրայր Սեֆիլյանի կողմից արված հասցեական կոչը: «Առաջին լրատվական»-ի հետ զրույցում նշեց, որ վերջին 30 տարիների ընթացքում մենք կամ սեփական կեղծ օրակարգով ենք առաջ շարժվում կամ՝ դրսից հրամցված:
«Հիմնական կեղծ օրակարգը, որ այս վերջին 30 տարիներին մենք ձևացրել ենք՝ ազատվել այս ինչից օրակարգն է, ազատվել կոնկրետ անձից: 1988-ին մենք ազատվում էինք կոմունիստական նոմենկլատուրայից, ես չեմ ասում՝ կուսակցությունից, որովհետև կային նաև շատ ազնիվ մարդիկ, բայց իշխում էր նոմենկլատուրան, որը բավականին կաշառակեր էր այդ ժամանակ, ճիշտ է, բացարձակապես ոչ այնքան, որքան այսօր են, բայց մենք ուզում էինք ազատվել, հնչում էր՝ նոմենկլատուրա հեռացիր, հետո եկավ Շարժումը, իշխանություն ձևավորվեց, և շուտով շարժման առաջնորդի ղեկավարությամբ, զարմանալիորեն կրկնելով այդ սխալները, կանգնեցին ժողովրդական պահանջի առաջ՝ Լևոն, հեռացի՛ր, չնայած նրան, որ թվում էր, թե ձևավորեցին ազնվագույն մարդկանցով իշխանություն: Հետո՝ Ռոբերտ, հեռացի՛ր, և հիմա՝ Սերժ, հեռացի՛ր: Այս օրակարգն անընդհատ կրկնվում է, 2 անգամ հեղափոխական փոփոխություն է եղել շնորհիվ այդ հարցի բարձացման, ինչի մասին Ժիրայրը խոսում է, ընդվզող ժողովուրդը հեռացրեց կոմունիստական նոմենկլատուրային, հետո էլի ընդվզումը բերեց ներիշխանական պառակտման, ինչը հանգեցրեց իշխանության հեռացման, 3-րդ անգամ Սերժ Սարգսյանը ուղղակի փոխարինեց Ռոբերտ Քոչարյանին: Ամեն անգամ անցումը բերել է վատ վիճակների: Սա նշանակում է, որ այս օրակարգը կեղծ է. պետք է հեռանա ինչ-որ անձ, այլ շատ ավելի խորքային բան, և եթե դա չեք հնչեցնում՝ իրական օրակարգի մեջ չեք»,- շեշտեց նա:
Աշոտ Մանուչարյանը ընդգծեց, որ եթե ընդհանուր փիլիսոփայությունը չի վերանայվում՝ իշխանափոխությունը հանգեցնում է աղետի, նա ո՛չ Ժիրայր Սեֆիլյանից, ո՛չ ցուցակից որևէ մեկից չի լսել փիլիսոփայության փոփոխության անհրաժեշտության մասին:
«Դուք ուզում եք ստեղծել մարդկանց խումբ, որ ուզում են փոխել կյանքի բովանդակությունը, եթե դուք ճշգրիտ չեք սահմանում, ինչը պետք է փոխեք, դուք դատապարտված եք պարտության: 30 տարի առաջ մենք մի սխալ կատարեցինք, վերցրեցինք մի փիլիսոփայություն, որին ես անվանում եմ տիկին Վարդուշի փիլիսոփայություն, տիկին Վարդուշին ասացին, որ մարդը պետք է ձգտի բարեկեցիկ կյանքի: Եվ տիկին Վարդուշը համոզվեց, որ եթե իր որդին ունի 20 շապիկ, ապա նա 5 անգամ ավելի երջանիկ է, քան դիմացինի որդին, որն ունի ընդամենը 4 շապիկ: Եթե մի քիչ խորքային խոսենք, ասեինք՝ ուզում ես, որ որդիդ լինի գիտնական, ապրի համեստ կյանքով, թե լինի մեծ ունևոր, անընդհատ խլի, ինչպես այսօր անում են օլիգարխները, մեկը, մյուսը, նա կընտրեր առաջինը, բայց այդ ընտրությունը չի կատարվում: Անընդհատ այս բզկտող փիլիսոփայությունն է, որ բարեկեցիկ կյանք է կոչվում, չափ չի սահմանվել, միմյանց հանդեպ կատարում են հանցագործություններ»,- ընդգծեց նա:
Մանրամասները՝ տեսանյութում:
