Օրենսդիր, գործադիր և դատական իշխանության մարմինների աշխատողների աշխատավարձի համար հատկացվող գումարները եկող տարվա պետբյուջեով ավելանում են: 2014թ.-ի համար ծրագրավորվել է 48 մլրդ 450 մլն 400 հազար դրամ, ինչն անցած տարվա ծրագրավորվածից ավելի է 9 մլրդ 28 մլն 400 հազար դրամով: Այս աճը պայմանավորված է նրանով, որ 2014թ.-ին բարձրացվելու է նվազագույն աշխատավարձը և բացի դրանից պետական պաշտոնյաների աշխատավաձերը հաշվարկվելու են նոր ձևով:
Այսպես 2014 թվականի հուլիսի 1-ից մինչև դեկտեմբերի 31-ը ընկած ժամանակահատվածի համար աշխատավարձի ֆոնդի հաշվարկման հիմքում ընկած է կառավարության կողմից շրջանառության մեջ դրված «Պետական պաշտոններ զբաղեցնող անձանց վարձատրության մասին» ՀՀ օրենքի նախագիծը, որով սահմավում է միասնական համակարգ պետական պաշտոն զբաղեցնող անձանց վար¬ձատրության համար: Պետական պաշտոնյաներից յուրաքանչյուն ունենալու է որոշակի գործակից, որը բազմապատկվելու է սահմանված բազային աշխատավարձին և ստացվելու է հիմնական աշխատավարձը:
Եվ ամենաբարձր գործակիցը նախագահինն է` 20, այնուհետև ԱԺ նախագահի ու վարչապետի աշխատավարձի գործակիցն է` 18: Բարձր գործակիցների հնգյակում են նաև Սահմանադրական դատարանի նախագահի` 16 ու Ազգային անվտանգության խորհրդի քարտուղարի` 15.5 գործակիցները: Այս պաշտոնյաներից մի փոքր են հետ մնում փոխվարչապետը, գլխավոր դատախազը, Վճռաբեկ պալատի նախագահը, Վերահսկիչ պալատի նախագահն ու Մարդու իրավունքների պաշտպանը` 15:
Սա կառավարության օրենսդրական փաթեթն է, որը պետական բյուջեի հետ մեկտեղ կներկայացվի Ազգային Ժողովի հաստատմանը:
