Սահմանադրական իրավունքի մասնագետ Վարդան Այվազյանը կարծում է, որ ԵԽԽՎ հայաստանյան պատվիրակության կազմից «Ժառանգություն» խմբակցության անդամ Զարուհի Փոստանջյանին հեռացնելուց առաջ ճիշտ կլիներ այդ հարցը քննարկել ԱԺ էթիկայի հանձնաժողովում և առաջնորդվել հանձնաժողովի որոշմամբ:
«Առաջին լրատվական»-ի հետ զրույցում Վարդան Այվազյանը նշեց, որ ԵԽԽՎ պատվիրակության կազմի հաստատումը կարգավորվում է ԱԺ կանոնակարգ-օրենքի 18-րդ հոդվածով, որով սահմանվում են ԱԺ նախագահի լիազորությունները: Համաձայն 18-րդ հոդվածի «Է» կետի՝ ԱԺ նախագահը, «խորհրդակցելով Ազգային ժողովի խմբակցությունների և պատգամավորական խմբերի հետ՝ հաստատում է միջազգային խորհրդարանական կազմակերպություններում, միջխորհրդարանական հանձնաժողովներում Ազգային ժողովի պատվիրակությունների կազմերը, դրանց կազմավորման և գործունեության կարգերը»: Այվազյանը հավանական համարեց, որ պատգամավորական խմբակցությունների հետ խորհրդակցության հիման վրա պատվիրակության կազմում փոփոխություն անելու, նոր կազմ հաստատելու առաջարկ լինի:
«Ես կասկած չունեմ, որ խմբակցությունները նման առաջարկ կներկայացնեն, որովհետև և պատգամավորական էթիկայի, և մյուս առումներով տեղի է ունեցել շատ լուրջ խախտում, էլ չեմ ասում՝ հայրենասիրության ճիշտ հակառակի՝ դավաճանության մասին, որովհետև նման անհատական բնույթի, կենցաղային հարցեր ԵԽԽՎ-ում չեն քննարկում»,- ասաց նա:
Այվազյանի կարծիքով՝ եթե ԵԽԽՎ-ն պահանջում է, որ բոլոր խմբակցություններից պարտադիր ներկայացուցիչներ լինեն, այս պարագայում ուղղակի անձին կարող են փոխել, ասենք՝ պատվիրակության կազմից Փոստանջյանին հանեն, նույն խմբակցությունից մեկ այլ՝ պարկեշտ մարդու ընդգրկեն նրա փոխարեն:
Սահմանադրագետը չի կարծում, որ պատվիրակության կազմից նրան հեռացնելը Եվրոպայի կողմից կարող է ընկալվել որպես ճնշում ընդդիմադիր պատգամավորի նկատմամբ: «Դա բացարձակապես ճնշում չէ, ինչո՞ւ. որովհետև ընդդիմադիր լինելը դեռևս չի նշանակում սանձարձակություն ու ամենաթողություն. սա է խնդիրը: Հիմա եթե մենք Եվրոպայից վեր կանգնենք ու հարցը քննենք բարոյականության և մեր պետության հեղինակության հարթության մեջ՝ ազգային շահերի տեսակետից, ակնհայտ կլինի, որ ընդդիմադիր լինելն ու խոսքի ազատությունը ամենևին չեն նշանակում սանձարձակություն, ամենաթողություն, խոսքի լկտիություն»,- ասաց նա:
