Ադրբեջանական APA լրատվական գործակալության փոխանցմամբ, աշխատանքային այցով ԱՄՆ-ում գտնվող Ադրբեջանի արտգործնախարար Էլմար Մամեդյարովը Վաշինգտոնում հանդիպում է ունեցել ԵԱՀԿ Մինսկի խմբի ամերիկացի համանախագահ Ռոբերտ Բրադտկեի հետ։ Հանդիպման ժամանակ կողմերը քննարկել են ղարաբաղյան հակամարտության կարգավորման հարցը։
Բացի այդ, նա հանդիպումներ է ունեցել տարածաշրջանային հարցերով հանրահայտ մասնագետների՝ Բրուքինգսի ինստիտուտի ԱՄՆ-ի ու Եվրոպայի կենտրոնի տնօրեն Ֆիոնա Հիլի, Ջորջ Վաշինգտոնի անվան համալսարանի Եվրոպայի, Ռուսաստանի ու Եվրասիայի հետազոտությունների գծով փոխտնօրեն Քորի Ուելթի, Կարնեգիի հիմնադրամի Ռուսաստանի ու Եվրասիայի հարցերով առաջատար փորձագետ Թոմաս դե Վաալի, Ջեյմսթաունի հիմնադրամի տնօրեն Գլեն Հովարդի հետ։
Մամեդյարովը նրանց իրազեկել է Ադրբեջանի տարածաշրջանային քաղաքականության և ղարաբաղյան հակամարտության կարգավորմանն առնչվող բանակցային գործընթացի մանրամասների մասին։
Երեկ էլ Մամեդյարովը Վաշինգտոնում հանդիպել է ազգային անվտանգության հարցերով ԱՄՆ նախագահի նախկին խորհրդական Զբիգնև Բժեզինսկու հետ։ Վերջինիս հետ Մամեդյարովը քննարկել է տարածաշրջանային և գլոբալ հարցեր։
Հիշեցնենք, որ երեկ էլ Մամեդյարովը հանդիպում էր ունեցել համաշխարհային մամուլի ներկայացուցիչների հետ՝ նրանց ներկայացնելով ղարաբաղյան հակամարտության կարգավորմանն առնչվող բանակցային գործընթացի մանրամասները։