Հնագետները Գվատեմալայում հայտնաբերել են հին մայաների քաղաքակրթության աղի արտադրության կենտրոն: Այս մասին հաղորդում է Ria Novosti-ն:
Հայտնաբերված կենտրոնը գտնվում է Սալինաս-դե-լոս-Նուևե-Սերոս շրջանում, որտեղ նախկինում գտնվել է մայաների քաղաքներից մեկը: Այն նախատեսված էր աղի արդյունահանման և մշակման համար, որը հետագայում մատակարարում էին նաև ժամանակակից Գվատեմալայի և Մեքսիկայի տարածքում գտնվող մայաների պետության տարբեր շրջաններ:
Պեղումների վայրում հայտնաբերվել են աղի արդյունահանման հետ կապված բազմաթիվ առարկաներ, ինչպես նաև հսկայական տարաներ, որոնցում պահվել է աղը: Հնագետների եզրակացությամբ՝ աղի արտադրությունն ունեցել է բավականին մեծ ծավալներ:
Այդ մասին է վկայում հայտնաբերված հատուկ՝ 200-ը 300 մետրի վրա հարթակը՝ 13 մ խորությամբ, որտեղ էլ իրականացվել են աշխատանքները: Մայաները կարողացել են արտադրել տարեկան 24 հազար տոննա աղ:
