Վանաձորի ավագանու «Լուսավոր Հայաստան» խմբակցությունը հերթական գրությամբ դիմել է համայնքի ղեկավարին՝ պահանջելով պարզաբանել, թե ինչու չի վճարվում համայնքային որոշ կազմակերպությունների աշխատավարձերը: Աշխատանքային օրենսգիրքը պահանջում է, որ աշխատավարձերը վճարվեն մինչև ամսվա 15-ը, սակայն հուլիսի 24-ի դրությամբ Վանաձորի մի շարք մանկապարտեզների, գրադարանների, մշակութային հաստատությունների և համայնքային ենթակայության այլ կազմակերպությունների աշխատակիցներ դեռ չեն ստացել իրենց հունիս ամսվա աշխատավարձը:
Վանաձորի ավագանու «Լուսավոր Հայաստան» խմբակցության քարտուղար Անահիտ Կարապետյանը «Առաջին լրատվական»-ի հետ զրույցում ասաց, որ սա առաջին անգամ չէ, որ աշխատավարձերը ուշանում են: «Այդ խնդրով առաջին անգամ ես գրություն ուղարկել եմ դեռևս աշնանը: Արդեն դեկտեմբեր ամիսն էր գալիս, սակայն աշնան աշխատավարձերը չէին վճարվել: Իսկ հիմա արդեն հուլիս ամիսն է ավարտվում, սակայն հունիսի աշխատավարձերը դեռ չեն վճարվել: Մայիս ամսվանն էլ վճարվել է հունիս ամսին: Մենք բազմաթիվ բողոքներ, դիմումներ ենք ստանում աշխատավարձերի ուշացման հետ կապված»,- ասաց Անահիտը:
Վերջինիս խոսքով՝ իրենց գրություններին քաղաքապետարանից մեկ անգամ որպես ուշացման պատճառ նշվել է այն, որ համայնքային բյուջեի եկամուտների մեծ մասը հավաքագրվում է բյուջետային տարվա չորրորդ եռամսյակում: Բացի այդ, նշվել է, որ համայնքապատկան հիմնարկների աշխատակիցների մեծ մասը արձակուրդ է գնում ամռանը, դրա համար վճարումների հարցը դժվարանում է:
«Աբսուրդը կայանում է նրանում, որ երբ ես առաջին անգամ ֆեյսբուքյան գրառման միջոցով բարձրաձայնեցի այս խնդրի մասին, պարոն Ասլանյանը արձագանքեց, թե իրենք աշխատավարձային պարտք չունեն: Եվ ես ստիպված եղա մի շարք քաղվածքներ հանել, որպեսզի ապացուցեմ, որ աշխատավարձերը չեն վճարվել, և իրենք մեր գրություններին սխալ են պատասխանում: Դրանից հետո մեկ-եկու օրվա մեջ պարտքը մարվեց: Իսկ դրանից հետո ես գրություն ուղարկեցի մայիս ամսին, որի պատասխանը նրանք այնքան ձգձգեցին, որ աշխատավարձերը փոխանցեցին, և հենց դրանք նստեցին քարտերին, հենց նույն օրը քաղաքապետարանից պատասխանեցին, թե իրենք աշխատավարձային պարտք չունեն»:
Իսկ վերջին՝ հուլիսի 21-ի գրությանը պատասխանել են, որ իրենք կփորձեն առաջիկա մեկ շաբաթվա մեջ մարել աշխատավարձային պարտքը:
Վանաձորի քաղաքապետ Մամիկոն Ասլանյանը, «Առաջին լրատվական»-ի հետ զրույցում անդրադառնալով աշխատավարձերի ուշացման խնդրին, ասաց, որ «առանձնապես խնդիր չկա: Ու աշխատավարձերի ուշացումը այդքան չէ, որքան նշվում է: Մեկ-երկու» օրվա հարց է:
«Ուշացման պատճառները տեխնիկական են: Ամեն ինչ լուծվում է: Վաղը չէ մյուս օրը երևի կլուծվի: 1-2 օրվա ուշացում է: Իսկ պատճառն այն է, որ մուտքերը այս ամիսներին դադարում են, սեզոնային աշխատանքները՝ ասֆալտ, աղբահանություն, ավելանում են, դրա հետ կապված՝ մի քիչ ուշանում է, բայց մի քանի օրից ոչ շատ: Էական ոչ մի խնդիր չկա»,- ասաց քաղաքապետը:
