Իրանի նախագահ Հասան Ռուհանին հայտարարել է, որ իր երկիրը պատրաստ է միջուկային ծրագրի հարցով բանակցություններ վարել արևմտյան տերությունների հետ: Այս մասին հայտնում է Associated Press-ը:
«Իրանի ժողովուրդը պատրաստ է Արևմուտքի հետ բանակցությունների և խոսակցությունների»,- ասել է նա:
Երկուշաբթի օրը Ռուհանին կմեկնի Նյու Յորք՝ մասնակցելու ՄԱԿ-ի Գլխավոր ասամբլեայի գագաթնաժողովին: Իրանի նախագահի խոսքերով՝ դա կարելի է օգտագործել որպես հնարավորություն՝ անցնելու խաղաղ ատոմի հարցը քննարկելուն:
Արևմտյան պետությունների կարծիքով՝ Իրանը սեփական միջուկային զենք է ստեղծում: Թեհրանը պնդում է, որ միջուկային էներգիան օգտագործում է բացառապես խաղաղ նպատակներով:
Ավելի վաղ Ռուհանին խոստացել էր համագործակցել այլ երկրների հետ ահաբեկչության, թմրանյութերի ապօրինի շրջանառության, կիբեռհանցավորության և մշակութային ագրեսիայի և այլ խնդիրների լուծման համար: ԱՄՆ-ը հայտարարել է, որ դա բավարար չէ միջուկային ծրագրի հարցում հակասությունների վերացման համար:
