ԱԺ պետական-իրավական և մարդու իրավունքների պաշտպանության հարցերի մշտական հանձնաժողովը՝ Հրայր Թովմասյանի նախագահությամբ, այսօր առաջին ընթերցմամբ քննարկել է «Հայաստանի Հանրապետության կառավարության կառուցվածքի մասին» և կից օրենքների նախագծերի փաթեթը, որով, ըստ հիմնական զեկուցող, ՀՀ արդարադատության նախարարի առաջին տեղակալ Արթուր Հովհաննիսյանի, առաջարկվում է ուժը կորցրած ճանաչել «ՀՀ կառավարության կառուցվածքի մասին» 2008 թվականի հունիսի 17-ին ընդունված օրենքի 1-ին հոդվածի 1-ին մասի 18-րդ կետը։
Նշվել է, որ օրենքի նախագիծը նպատակ ունի ՀՀ կառավարության կառուցվածքը համապատասխանեցնել 2015թ-ի դեկտեմբերի 6-ին ընդունված Սահմանադրության փոփոխություններին, համաձայն որի՝ նախարարների թիվը պետք է լինի տասնութը։
«ՀՀ կառավարության աշխատակազմի ղեկավար-նախարար» քաղաքական պաշտոնը փոխարինվում է «ՀՀ կառավարության աշխատակազմի ղեկավար» հայեցողական պաշտոնով՝ համապատասխանաբար փոփոխելով նաև նրա տեղակալների պաշտոնների անվանումները։
ԱԺ նախագահի տեղակալ Արփինե Հովհաննիսյանը հարակից խոսքում գործընկերներին հորդորել է կողմ քվեարկել օրենսդրական փաթեթին։
ԱԺ պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Հրայր Թովմասյանն առաջարկել է ՀՀ ԱԺ աշխատակազմի ղեկավար-գլխավոր քարտուղարի աշխատավարձի դրույքաչափը սահմանել 12 գործակցով։
Կառավարության ներկայացուցիչն ընդունել է առաջարկությունը։ Հանձնաժողովականները նախ միաձայն քվեարկությամբ դրական են արտահայտվել առաջարկությանը, ապա դրական եզրակացություն տվել օրենսդրական փաթեթին՝ խորհրդարանի մայիսի 30-ին հրավիրված արտահերթ նիստի օրակարգի նախագծում ընդգրկվելու համար։
