Եգիպտոսի բանակն ու ոստիկանությունը սեպտեմբերի 16-ին վերահսկողություն են սահմանել Դելգա քաղաքի նկատմամբ, որը նախկինում վերահսկվում էր տապալված նախագահ Մուհամմադ Մուրսիի կողմնակիցների թվին պատկանող իսլամիստների կողմից՝ գրում է The Guardian-ը:
Եգիպտոսի կենտրոնում գտնվող քաղաքը, որը 120 հազար բնակչություն ունի, ավելի քան 2 ամիս գտնվում էր իսլամիստների փաստացի վերահսկողության տակ:
Իշխանության զավթումից հետո Մուրսիի կողմնակիցները Դելգայում ահաբեկչության արշավ էին սկսել տեղացի ղպտիների դեմ, ովքեր համարվում են նախագահին տապալած գեներալների դաշնակիցներ: Իսլամիստները հրդեհել են եկեղեցիներ, ղպտիներին պատկանող խանութներ ու տներ: Ղպտիները կազմում են քաղաքի բնակչության 1/6 մասը: Առնվազն 100 քրիստոնյա ընտանիք լքել է քաղաքը՝ խուսափելու համար հետապնդումներից:
Հրդեհված ու թալանված սրբավայրերի թվում է Կույս Մարիամի 1600-ամյա վանքը:
«Մուսուլման եղբայրների» ներկայացուցիչներն արդեն հայտարարել են, որ շարժումը ոչ մի կապ չունի այդ հարձակումների հետ, որոնց հետևում կանգնած են սովորական հանցագործները: Նրանց խոսքով՝ ղպտիները խնդիր են հորինում:
Նախկինում ոստիկանական ուժեղացված ստորաբաժանումներն ու զինվորականներն արդեն երկու անգամ փորձել են վերադարձնել վերահսկողությունը բնակավայրի նկատմամբ, սակայն ամեն անգամ հանդիպել են կատաղի դիմակայության: Քաղաքը հետ գրավել հաջողվել է միայն հավելյալ ուժերի ներգրավմամբ: Մինյա նահանգի ղեկավարությունը հայտարարել է, որ նման օպերացիաներ են ծրագրվում նաև մի շարք հարակից քաղաքներում, որոնք նույնպես հայտնվել են իսլամիստների իշխանության ներքո:
