Կառավաության նիստին վարչապետ Կարեն Կարապետյանը կրթության և գիտության նախարար Լևոն Մկրտչյանին հանձնարարեց 15-օրյա ժամկետում ներկայացնել օպտիմալացման վերաբերյալ առաջարկություններ: Մեզ հետ զրույցում նախարարը նշել է, որ այս գործընթացում առաջնային է լինելու կրթության որակը, մշակվելու է դպրոցների զարգացման համալիր ծրագիր:
Թեմայի շուրջ «Առաջին լրատվական»- ի հետ զրույցում «Մխիթար Սեբաստացի» կրթահամալիրի տնօրեն Աշոտ Բլեյանը նշեց. «Շրջանառության մեջ է դրվել դպրոցների օպտիմալացման խնդիրը. օպտիմալացում նշանակում է առավել նպաստավոր պայմաններ ստեծել… Օպտիմալացումը նոր մանկավարժության, նոր կրթության միջավայր ստեղծեու համար է, հակառակ դեպքում, օպտիմալացում ասելով, կարող են հասկանալ միայն դպրոցների փակումը, ինչը վտանգավոր է, իսկ ինչո՞ւ չեն կարող առաջանալ»:
Վարչապետի այս հանձնարարությունը Բլեյանը դիտում է որպես վարչապետի կողմից ձևակերպված պահանջ, որ կրթության կազմակերպումը չի բավարարում հասարակությանը և պետք է ավելի նպաստավոր պայմաններ ստեղծել, գնալ ավելի համարձակ, ամբողջական, խորքային փոփոխությունների: Կրթահամալիրի տնօրենը նշեց, որ այս առումով ողջունել է այս հանձնարարականը, բայց ոչ դպրոցների փակելը:
«Հարց է առաջանում. իսկ ի՞նչ ոչ նպաստավոր վիճակում են գլխավոր անձինք՝ սվորողը և սովորեցնողը՝ ուսուցիչը, ի՞նչը պետք է փոխել և ինչպե՞ս է նախատեսվում իրականացնել օպտիմալացումը, ընդհանրապես մեթոդի հարցը մեզանում միշտ շրջանցվում է»,- նշեց Ա. Բլեյանը՝ հավելելով, որ ձևակերպված չեն, թե ինչպիսի սովորող և ուսուցիչ ենք ուզում ունենալ:
Նա նաև նշեց, որ նույն ծավալի աշխատանքը կատարելով՝ ուսուցիչները տարբեր չափի աշխատավարձ են ստանում, խտրությունը վերացված չէ, ուսուցիչը պաշտպանված չէ. նախևառաջ այս հարցը պետք է լուծել: Բլեյանի կարծիքով՝ ուսուցման անհատականացումը եթե չի դառնում առավել նպաստավոր պայման, ապա արդյունքում ինչ-որ հաստատություններ կարող են փակել, բացել, միավորել, «Այսինքն՝ մի շարժում կստացվի, որը, ինչպես Հեմինգուեյը կասեր՝ ամեն ինչ է, բայց գործողություն չէ»:
«Ես «տեր վռազներից» եմ, բայց հիմա ավելի շատ եմ ասում՝ մի՛ շտապեք: Հանկարծ անորակ լուծումների չգնաք, ավելի լավ է մի ամիս էլ ուշանանք, քան թե հանկարծ արագությամբ, անպատրաստ լինելով, սխալվենք»,- ընդգծեց Ա. Բլեյանը:
Մանրամասները՝ տեսանյութում:
