Իսրայելի իշխանությունները համաձայնել են Մոսսադի հետախուզության նախկին աշխատակցի հարազատներին 1,1 մլն դոլար վճարել, որպեսզի խուսափեն «երկրի ազգային անվտանգության համար սպառնալիք» հանդիսացող դատավարությունից՝ հաղորդում է Reuters-ը:
Խոսքը Բեն Զայգերի ընտանիքի մասին է։ Զայգերը, ում մահը 2010 թ. հանրային մեծ իրարանցում էր առաջացրել, մամուլում ստացել է «Իքս կալանավոր» անվանումը։
Ավստրալիական Fairfax և գերմանական Spiegel պարբերականների տվյալներով՝ Զայգերը 2000 թ. Մելբուռնից տեղափոխվել էր Իսրայել, քաղաքացիություն էր ստացել և դարձել էր Մոսսադի գործակալ: Ավելի ուշ, ինչպես գրել են լրատվամիջոցները, Զայգերը «Հըզբոլլահին» հաղորդել էր երկու լիբանանցի գործակալների անուններ, որոնք հետագայում ձերբակալվել էին ու դատապարտվել լրտեսության համար: 2010 թ. Զայգերն ինքը ձերբակալվել էր և գտնվում էր Իսրայելի բանտում:
Մի քանի ամիս անց նրան կախված էին հայտնաբերել, չնայած, որ խուցը, որտեղ նա գտնվում էր, շուրջօրյա նկարահանման տեսախցիկներ ուներ:
Իսրայելը համաձայնել է 1,1 մլն դոլար վճարել Զայգերի ընտանիքին, որպեսզի «խուսափի դատավարությունից, որտեղ կարող էին երկրի ազգային անվտանգությանը սպառնացող մանրամասներ հրապարակվել»։ Այս մասին ասվում է Իսրայելի արդարադատության նախարարության մեկնաբանությունում:
