Ռուսաստանի նախագահ Վլադիմիր Պուտինի խորհրդական Սերգեյ Գլազևը հարցազրույց է տվել «Էխո Մոսկվի» ռադիոկայանին, որում անդրադարձել է նաև Հայաստանի Հանրապետության հնարավոր անդամակցմանը Մաքսային միությանը:
Նրա կարծիքով՝ ընդհանուր սահմանների բացակայությունը Հայաստանի համար խոչընդոտ չի հանդիսանա Մաքսային միությանն անդամակցելու հարցում: Որպես օրինակ՝ նա բերել է Կալինինգրադի մարզը, որը նույնպես ընդհանուր սահման չունի ՄՄ-ի հետ:
Լրագրողի այն դիտարկմանը, որ Հայաստանն, ի տարբերություն Կլինինգրադի մարզի, այլ պետություն է, Գլազևը նշել է. «Մեզ համար տարբերություն չկա՝ պետություն է դա, թե պետության մարզ: Կարևորն այն է, որ միասնական մաքսային տարածք է: Մեր միասնական մաքսային տարածքում արդեն հինգերորդ տարին է՝ գոյություն ունի Կալինինգրադի մարզը, որի հետ ընդհանուր սահմաններ չկան»:
Լրագրողի այն դիտարկմանը, որ ի տարբերություն Կալինինգրադի՝ Հայաստանը ծով չունի, Գլազևը արձագանքել է, որ Հայաստանը պատրաստվում էր Ասոցացման համաձայնագիր ստորագրել ԵՄ-ի հետ: Նրա խոսքերով՝ ըստ ասոցացման համաձայնագրի՝ Հայաստանը պարտավորվում էր կատարել ձկնորսության, ակվամշակույթի և ծովային տրանսպորտի ԵՄ նորմերը:
Միևնույն ժամանակ Գլազևն ընդունել է, որ ընդհանուր սահմանի բացակայությունը որոշակի բարդություններ կառաջացնի:
«Ամենայն հավանականությամբ, մենք կսահմանենք ապրանքների մոնիթորինգ, որոնք հատում են Հայաստանի պետական սահմանը… Սակայն չեն լինի ո՛չ մաքսատուրքեր, ո՛չ մաքսային ձևակերպումներ: Կլինի մոնիթորինգ, որի կանոնները կամրագրվեն հատուկ կերպով»,- ասել է Գլազևը:
