Վերաքննիչ քրեական դատարանի վարույթում է Ռոբերտ Մարտիրոսյանի և Արմեն Գրիգորյանի գործով բերված վերաքննիչ բողոքների քննությունը: Գործը քննվել է Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ:
Ամբաստանյալները մեղադրվել են նախնական համաձայնությամբ, շահադիտական դրդումներով մարդու առևանգման, նրանից շորթում կատարելու համար:
Տուժողը՝ Վահրամ Ս.-ն, զբաղվում է ադամանդների ներկրմամբ ու վաճառքով: Նա Երևանի Խորենացում փողոցում գործող «Ոսկու աշխարհ» առևտրի կենտրոնում ադամանդե քարերի առուվաճառքով զբաղվող «ՍՎՍ Դայմոնդ» ՍՊԸ տնօրենն է:
Որպես նրա առևանգումը կազմակերպած ու իրականացրած գլխավոր գործող անձ՝ մեղադրվում է նաև նախկին գործընկեր Գագիկ Մ.-ն, ով ներկայումս գտնվում է հետախուզման մեջ:
Վահրամ Ս.-ն ադամանդների ներկրումով զբաղվող ֆիրման բացել է 2013 թվականին, ադամանդներ ներկրում է Էմիրաթներից ու Հնդկաստանից:
Դատարանում տուժողը հայտնել է, թե ամբաստանյալներից՝ Ռոբերտին ճանաչել է, նրա հետ եղել է նորմալ հարաբերությունների մեջ, իսկ Արմենին ճանաչել է դեպքի բերումով:
2014 թվականից, չկարողանալով մերժել Գագիկ Մ.-ի ու նրա ընտանիքի խնդրանքները՝ նրան ներգրավել է ադամանդե քարերի ներկրման բիզնեսի մեջ:
Մի քանի անգամ Վահրամը Գագիկին ադամանդե քարեր է տվել, նա վաճառել, գումարը հանձնել է Վահրամին:
Վերջինս իր հետ Էմիրաթներ ու Հնդկաստան է տարել Գագիկին, իր անունով, իր կապերը օգտագործելով, պայմանագրով վերցրել է ադամանդե քարեր, տվել է Գագիկին, որ վաճառի:
Գագիկն աստիճանաբար պարտքեր է կուտակել:
Վահրամը սկսել է Գագիկին ավելի քիչ ապրանք տալ, հետը չէր տանում արտերկիր, ավելի հաճախ էր պահանջում պարտքերի մարում: «Ասում էի՝ սենց չի կարող շարունակվել, պիտի փակվես… 2015 թվականի հունիսի կեսերին մեր մեջ խոսակցություն եղավ, ասի՝ լավ չես աշխատում, պետք է գումարները վերադարձնես… Նա արդեն ինձ 50 հազար դոլար պարտք էր: Ասել էր՝ կտամ…»:
2015 թվականի օգոստոսի 3-ին, ժամը 12-ն անց 40-ին Վահրամին զանգել է Ռոբերտը, ասել է, թե գումար են ուղարկել՝ մոտ 12 հազար դոլար, որ Գագիկը պարտքի մի մասը մարի:
Մոտ 40 րոպե անց Ռոբերտը նորից է զանգել ու պայմանավորվել է Վահրամի հետ հանդիպել Խորենացու փողոցում՝ ոսկու շուկայի մոտ:
Վահրամն այնտեղ գնալով՝ տեսել է Գագիկի մեքենան: Գագիկն ասել է, թե գումարը ստանալու համար պետք է մեկնեն Աբովյան, քանի որ գումարը, իբր, ռուսական ռուբլիով է ուղարկվել, իսկ Աբովյանի բանկում ծանոթ կա, ով շահավետ փոխարժեքով կարող փոխանակում կատարել:
Վահրամը ոչինչ չի կասկածել: Նստել է առջևի նստատեղին: Գագիկն ասել է՝ Ռուբոն գա ու գնանք:
Ռոբերտը դուրս է եկել ոսկու շուկայից, նստել է մեքենայի հետևի նստատեղին: Շարժվել են դեպի Աբովյան:
«Շանգրիլա»-ի մոտ Գագիկը ցույց է տվել, թե ուզում է զանգել, բայց, իբր, հեռախոսի մեջ գումար չկա: Ռուբոն ասել է, թե իր հեռախոսի մեջ էլ գումար չկա:
Վահրամը ոչինչ չկասկածելով՝ իր հեռախոսի բլոկը հանել ու հեռախոսը տվել է Գագիկին, որ զանգի: Գագիկը զանգել, ինչ-որ մեկի հետ խոսել է, հետո անջատել է Վահրամի հեռախոսը ու գցել է մեքենայի «կարկմանչիկը», ապա «գազ է տվել» ու արագացրել է մեքենայի ընթացքը:
Վահրամի անհանգստությանն ի պատասխան՝ Գագիկն ասել է, թե գնում են «լավ տղերքի մոտ»:
Վահրամը պահանջել է, որ Գագիկը մեքենան աջ քաշի ու կանգնի: Ասել է, թե այդ դեպքում ինքը կմոռանա տեղի ունեցածը, տաքսիով կվերադառնա Երևան: Գագիկը պատասխանել է. «Արդեն ուշ է»: Գագիկը Վահրամին զարմացրել է՝ ասելով, թե նա է իրեն պարտք: Ու եթե այդ «պարտքը» չտա, նրա աներ Ուզբոն ու Ռուբոն կգնան «լավ տղերքի մոտ» ու կասեն, որ Վահրամը Ուզբոյից 200 հազար դոլար է վերցրել ու չի տալիս:
Գագիկը խորհուրդ է տվել, որ Վահրամը լսի իր խորհուրդը, մտածի ընտանիքի, բիզնեսի անվտանգության մասին:
Երբ Վահրամը փորձել է նրան համոզել, որ հետ կանգնի սխալ քայլից, Գագիկը, ըստ Վահրամի, բարձրացրել է շորը ու կողքին ամրացված դանակ է ցույց տվել ու ասել է. «Մի բան խոսաս՝ դանակը սիրտդ կմտցնեմ»:
Հրազդանի մոտակայքում, ըստ Վահրամի, ինքը համոզել է, որ ավելի լավ կլինի երկուսով առանձին խոսեն: Գագիկը կանգնեցրել է մեքենան, Ռոբերտն իջել ու նստել է հետևից եկող «Սեդանը», ինչից Վահրամը հասկացել է, որ իրենց հետևողներ կան, ու ինքը վտանգավոր իրավիճակում է հայտնվել: Նման պայմաններում նա վտանգավոր է համարել փախուստի դիմելը, քանի որ չգիտեր՝ հետևից եկող մեքենայի մեջ քանի՞ հոգի կային, ովքե՞ր էին, ինքն էլ չէր կարող Հրազդանի դաշտերում վազել ու օգնություն խնդրել…
Հասել են Սևան:
Լճափին մի չաշխատող օբյեկտի մոտ կանգ են առել: Այնտեղ նրանց դիմավորել են Ռոբերտը, Արմենը ու ևս երկու հոգի, ովքեր իրենց հեռու են պահել, բայց ներկա էին:
Որոշ ժամանակ Վահրամը շարունակել է համոզել Գագիկին, որ հիմարություն չանի: Նա պատասխանել է՝ չէ:
Գագիկը, ըստ Վահրամի, պահանջել է… 100 հազար դոլար: Վահրամը զարմացել ու ասել է, որ Գագիկն է իրեն 50 հազար դոլար պարտք, բայց Գագիկն ասել է, թե Վահրամը նրան երկու տարի առաջ համոզել է՝ լավ աշխատելու դեպքում երկու տարում 100 հազար դոլար կունենա: Գագիկն ասել է Վահրամին՝ դու ես ինձ 100 հազար դոլար խոստացել, ուրեմն էդքան պարտք ես ինձ…
Հետո Գագիկը Վահրամից պահանջել է նաև «Տուառեգ» մեքենան…
Վահրամն ասել է, թե 100 հազար դոլար չունի, մեքենան էլ չի տա: Գագիկը ասել է՝ էդ գումարի քարեր տուր:
Վահրամն ասել է՝ 100 հազար դոլարի քար չունեմ, նոր պիտի հանդիպեմ հնդիկներին, որ ապրանք ստանամ…
Վահրամը մտածել է՝ ժամանակ շահի, մինչև հասկանա, թե ինչ է կատարվում: Բայց Գագիկը, ըստ Վահրամի, ներվային շարժումներ է արել, ասել է՝ եթե Վահրամն իրեն 100 հազար դոլարի քար տա, ինքը դրանք ավելի էժան պիտի վաճառի, հետևաբար Վահրամն իրեն տալիք է… 150 հազար դոլարի ադամանդե քար: «Էս ի՞նչ ես անում»,- բացականչել է Վահրամը: Գագիկն ասել է. «Լավ, 120 հազար դոլարի քար կտաս, գործ անող մարդիկ ենք…»:
Երկուսուկես ժամ մնացել են Սևանում, ի վերջո Վահրամն առերևույթ համաձայնել է: Գագիկն ասել է Վահրամին. «Խելացի տղա ես, քեզ պրոբլեմների մեջ գցեցիր»: Վերադարձել են Երևան, վերադարձրել են Վահրամի հեռախոսը:
Ճանապարհին, ըստ Վահրամի՝ Գագիկը սպառնացել է. «Ազգուտակով բռնել կտամ, քեզ կկործանեմ…»:
Վահրամի ցուցմունքի համաձայն՝ մեկ օր է անցել, մինչև ինքն ուշքի է եկել: Ծանոթ ուներ, որ աշխատում էր ԱԱԾ-ում: Հանդիպել ու պատմել է գլխին եկածը: Երկու օր հետո ծանոթի հետ գնացել է ԱԱԾ Էրեբունու բաժին: Այնտեղ ասել են, թե Վահրամն իր ասածները չի կարողանա ապացուցել, հետևաբար պիտի շարունակի «խաղալ»:
Գագիկը պարբերաբար զանգել է Վահրամին ու զգուշացրել է, որ նա «ուրիշ քայլեր» չձեռնարկի:
Օգոստոսի 12-ին Վահրամը Գագիկի հետ մեկնել է Դուբայ՝ ադամանդե քարեր ձեռք բերելու: Միայն թե Վահրամի գործողությունները մշակված էին ԱԱԾ-ում: Վահրամը ադամանդե քարերի մեծ մասը պիտի փոստով ստանար: Գագիկը, ըստ Վահրամի, իրեն շատ ինքնավստահ էր զգում, էնտեղ «թանկուէժան էր անում»…
Օգոստոսի 22-ին Վահրամը հաղորդում է տվել Գագիկի ու նրա ընկերների կողմից իրեն շահադիտական դրդումներով առևանգելու վերաբերյալ:
Սեպտեմբերի սկզբին Վահրամին զանգել ու նրա հետ հանդիպել է Ռոբերտ Մարտիրոսյանը, ասել է, թե ինքը Վահրամի թշնամին չէ, Գագիկից վախենալով է նրա հետ եղել:
Վահրամը հաղորդագրություններ է ստացել Գագիկից ու նրա մերձավորներից՝ դու քցող ես, փախնում-միլիցեքի հետևում ես պախկվում…
Դատարանում տուժողը հիմնականում խոսել է Գագիկ Մ.-ի՝ իր դեմ կատարած գործողություններից, իսկ ամբաստանյալի աթոռին նստած Ռոբերտն ու Արմենը ներկայացվում էին անկարևոր դերերում: Կոնկրետ ամբաստանյալներ Ռոբերտի ու Արմենի գործողությունների մասին Վահրամ Ս.-ն դատարանում ասել է, թե Ռոբերտը առանձնապես լուրջ դերակատարում չի ունեցել, նա Սևանում գլուխը շարժելով դեսուդեն էր գնում, հաստատում էր Գագիկի ասածները: Արմենն էլ ասում էր՝ խոսք ես տվել, ուրեմն պարտք ես:
Ռոբերտը, ըստ Վահրամի, ցանկանում էր Գագիկի աչքին լավ երևալ: Ռոբերտը Վահրամի սանիկի ընկերն էր, նա էլ էր Վահրամին «քավոր» ասում: Գագիկն անընդհատ Վահրամին ասում էր, թե նա իր երեխաների կնքահայրն է լինելու, միայն թե Վահրամն անընդհատ ձգձգում էր, ինչ-որ բան կար, որ նրան կասկածելի էր թվում Գագիկի գործողություններում…
«Ես բողոք ունեմ Գագիկի կազմակերպած ամեն ինչի դեմ: Դատարանը թող որոշի՝ամբաստանյալներից ամեն մեկը ինչ մեղք ունի»,- դատարանում ասել է Վահրամը՝ պատասխանելով հարցին՝ բողոք ունի՞ տուժողը ամբաստանյալների դեմ:
Ռոբերտ Մարտիրոսյանն ու Արմեն Գրիգորյանը իրենց մեղավոր չեն ճանաչել, հայտնել են, թե Վահրամին չեն առևանգել, չեն սպառնացել, բջջային հեռախոսը չեն վերցրել, 50 հազար դոլար պարտքը զիջելու պահանջ չեն ներկայացրել: Իրենք գնացել են Սևան՝ ձուկ ուտելու…
Ընդհանուր իրավասության դատարանը Ռոբերտ Մարտիրոսյանին մեղավոր է ճանաչել շորթման ու առևանգման համար՝ ՀՀ քրեական օրենսգրքի 182 հոդվածի 3-րդ մասի 2-րդ և 131 հոդվածի 2-րդ մասի 1-ին, 2-րդ, 7-րդ կետերով: Ռոբերտ Մարտիրոսյանը վերջին հաշվով դատապարտվել է 7 տարի ազատազրկման:
Պատժի սկիզբը՝ 2016 թվականի ապրիլի 25-ից:
Արմեն Գրիգորյանը մեղավոր է ճանաչվել շորթման համար՝ ՀՀ քրեական օրենսգրքի 182 հոդվածի 3-րդ մասի 2-րդ կետով, և դատապարտվել է 6 տարի ազատազրկման: Պատժի սկիզբը՝ 2016 թվականի մայիսի 26-ից:
Դատավճռի դեմ վերաքննիչ բողոքներ են բերել ամբաստանյալների շահերի պաշտպանները՝ պահանջելով արդարացնել իրենց պաշտպանյալներին:
