«Իրազեկ քաղաքացիների միավորում» ՀԿ-ն հեռախոսազանգերով բացահայտել է, որ Հայաստանի 114 դպրոցների և մանկապարտեզների տնօրեններ ընդունել են, որ մարդկանց ցուցակագրում են ընտրությունների համար: Սա, ըստ ՀԿ-ի, վարչական ռեսուրսի չարաշահում է:
«Հանրակրթական դպրոցների և մանկապարտեզների թվով 136 տնօրեններից 114-ը հաստատել են, որ իրենք ցուցակագրում են անում և ցուցակները փոխանցում վարչական մարմիններին՝ քաղաքապետարաններին մարզպետարաններին, թաղապետարաններին կամ ՀՀԿ շտաբեր: Տնօրեններից մեկը ասել է, որ ցուցակը միանգամից փոխանցում է Միհրան Պողոսյանի «Քեթրին» ընկերությանը:
Այսինքն՝ Հայաստանի դպրոցների և մանկապարտեզների 90 տոկոսը հաստատել է, որ ցուցակագրում են մարդկանց: Ընդ որում՝ տնօրեններից շատերը ներկայացնում էին մանրամասներ: «Հանրապետականի շտաբից են» արտահայտությունը կախարդական էր ազդում տնօրենների վրա, և նրանք խոսում էին այլ կերպ, քան կխոսեին լրագրողների հետ, մանրամասներ էին ներկայացնում, թե քանի հոգի կան ցուցակներում, ռեյտինգային որ թեկնածուի համար են բարեխոսել և այլն: «Առաջին լրատվական»- ի հետ զրույցում այս մասին ասաց «Իրազեկ քաղաքացիների միավորում» ՀԿ համակարգող Դանիել Իոաննիսյանը՝ հավելելով, որ տնօրենների հավաստմամբ՝ այդ ցուցակների ծավալները տարբեր են:
«Միջինում դրանց չափը 240 է՝ դպրոցներում և մանկապարտեզներում՝ 150: Ամենամեծ ցուցակը (1700 հոգի) հավաքագրել է Գյումրու թիվ 37 դպրոցի տնօրենը, ում ամուսինը Գյումրու ընտրական տարածքային հանձնաժողովի նախագահն է: Այդ տնօրենն ասել է, որ ամեն ձևով վախեցրել են մարդկանց, որ անպայման Հանրապետականին ընտրեն, և որ իր ամուսինն էլ է այդ ուղղությամբ աշխատում»,- նշեց Դ Իոաննիսյանը:
Իոաննիսյանի հավաստմամբ՝ հիմնականում տնօրեններն աշխատում են տարածքային թեկնածուների համար, որոնց թվում նաև հայտնիներ կան՝ Արտակ Սարգսյան, Միհրան Պողոսյան, Սեյրան Սարոյան, Ռաֆիկ Գրիգորյանն, Վահրամ Բաղդասարյան:
Մանրամասները՝ տեսանյութում: