Բրիտանացի խորհրդարանականները հետաքրքված են ինտերնետ խաղով, որը թույլ է տալիս պարզել, թե որքան լավ նրանք աշխարհագրություն գիտեն: Խաղի կայքի մշակողը հայտարարել է, որ ոչ բոլոր բարձրաստիճան պաշտոնյաներն են կարողացել քարտեզի վրա գտնել Սիրիայի մայրաքաղաքը, իսկ խաղացողներից մեկն էլ նշել է, որ Դամասկոսը գտնվում է Մոնղոլիայում, հաղորդում է Interfax-ը:
Վերջերս usvsth3m.com վեբ-կայքում հայտնվել է խաղ, որի նպատակն է ինտերակտիվ աշխարհի ֆիզիկական քարտեզի վրա նշել Սիրիայի մայրաքաղաք Դամասկոսը: Խաղացողը քարտեզի վրա կետ է ընտրում, որից հետո տեսնում է՝ ինչքանով է սխալվել: Այս խաղը հայտնի է նաև Մեծ Բրիտանիայի խորհրդարանում:
Կայքի մշակող Ռոն Մանուելը նշել է, որ 1.15 հազար պատասխաններից, որոնք գրանցվել են հինգշաբթի առավոտյան, 19-ը եղել են Մեծ Բրիտանիայի խորհրդարանի համակարգիչներից:
Նրա խոսքերով՝ 18 բրիտանացի խորհրդարանականներ ցուցաբերել են ոչ վատ արդյունքներ՝ այն դեպքում, երբ նրանցից մեկը հույս է ունեցել Դամասկոսը գտնել Մոնղոլիայում:
«Հուսով եմ՝ այդ օրենսդիրը չի զբաղվում ռազմական գործողություններին վերաբերող հարցերով»,- կատակել է Մանուելը: