Համացանցում հայտնվել է Justdelete.me անվանումով նոր ծառայությունը, որը համացանցային օգտատերերին առաջարկում է ջնջել իրենց օգտահաշիվներն այս կամ այն կայքում կամ մեկընդմիշտ ազատվել սոցցանցի էջերից: Այս մասին հայտնում է TechCrunch-ը:
Բրիտանացի երկու մշակողների կողմից ստեղծված կայքն աշխատում է ավելի քան 120 կայքերի ու սոցցանցերի հետ: Յուրաքանչյուր ռեսուրսի Justdelete.me-ն կցում է կանաչ, դեղին, կարմիր կամ սև գույներից մեկը՝ կախված հեռացման գործընթացի բարդությունից:
Կանաչով նշվում են այն կայքերը, որտեղից օգտատիրական էջի հեռացման գործընթացն ամենահեշտն է: Դեղինով նշվում են այն կայքերը, որոնց հեռացման համար անհրաժեշտ են հավելյալ գործողություններ: Կարմիրով նշվում են այն ռեսուրսները, որոնցից էջ հեռացնելու համար պետք է դիմել աջակցության ծառայությանը: Եվ վերջապես սև գույնը նախանշում է, որ տվյալ ռեսուրսում օգտահաշիվ հեռացնելը սկզբունքորեն անհնար է (Wikipedia, WordPress, Craiglist և Evernote):
