Նախկին ԽՍՀՄ պետությունների շարքում Բելառուսը շատերի կողմից որակվում է որպես օրենքի երկիր, որտեղ նախագահ Ալեքսանդր Լուկաշենկոյի ջանքերով նվազագույնի է հասել կոռուպցիան: Նախագահի հրահանգով կաշառքի համար Բելառուսում չինովնիկները դատապարտվում են 15 տարվա ազատազրկման: Կոռուպցիայի նկատմամբ կոշտ դիրքորոշմանը զուգահեռ՝ նույն Բելառուսում առկա են երևույթներ, որոնք արդեն իսկ վարկաբեկել են երկրի հեղինակությունը: Երբ Ռուսաստանում խիստ սահմանափակում սահմանվեց խաղատների գործունեության վերաբերյալ, ռուս խաղամոլների մեծ հոսք սկսվեց Բելառուս, մասնավորապես՝ Մինսկ, որտեղ մինչ օրս ամեն քայլափոխի գործում են խաղատներ:
Ռուս խաղամոլները Բելառուսն անվանում են «ղումարի» հայրենիք: Նրանց համոզմամբ՝ բելառուսական խաղատները՝ գիտակցելով, որ ռուսաստանցիների համար դարձել են այլընտրանք, կոպտորեն խախտում են ազարտային խաղի կանոնները: Մասնավորապես, Մինսկում խաղային սարքավորումները շրջանառվող գումարի միայն 10 տոկոսը շահում մեխանիզմով են աշխատում:
Ինչևէ, այսօր հերթական սկանդալն է ծագել բելառուսական ֆուտբոլում: Ֆուտբոլային փորձագետների համոզմամբ՝ տարիներ շարունակ Բելառուսի ներքին առաջնությունների հանդիպումներում առուծախ է տեղի ունեցել: Վերջին սկանդալը, սակայն, թերևս ամենախոշորն է: Մասնավորապես, քննչական կոմիտեի կողմից 20 անձանց նկատմամբ մեղադրանք է առաջադրվել ֆուտբոլիստների և ակումբների ղեկավարների հետ միասին խաղերի ելքերի վրա ազդելու վերաբերյալ: Հայտնի է, որ մեղադրյալները, որոնց թվում կան նաև Ռուսաստանի և Ուկրաինայի քաղաքացիներ, ֆուտբոլիստների հետ բանակցել են նաև միջնորդների օգնությամբ:
Հայտնի է նաև, որ միջազգային բուքմեյքերական կազմակերպություններում Բելառուսի բարձրագույն և առաջին լիգայի առաջնության պայմանավորված խաղերին խոշոր չափի խաղադրույքներ են կատարվել: 20 անձանցից 5-ն արդեն իսկ ընդունել է մեղքը և զղջացել կատարվածի համար: Նրանց նկատմամբ քրեական գործը կարճվել է: 15 անձանց նկատմամբ քրեական գործը Քննչական կոմիտեն այսօր փոխանցել է դատախազություն, որն իր հերթին առաջիկա օրերին գործը կհանձնի դատարան: Բելառուսի քրեական օրենսգրքի «Պրոֆեսիոնալ մարզիկներին, ինչպես նաև սպորտային միջոցառումների մասնակիցներին և կազմակերպիչներին կաշառելու» հոդվածը նախատեսում է մինչև 4 տարվա ազատազրկում:
Սկանդալի հնչեղությունը կանխելու համար Բելառուսի ԶԼՄ-ները և իրավապահները հրաժարվում են կատարվածը որևէ կերպ մեկնաբանել: Չեն հրապարակվում մեղադրյալների անունները:
Հայտնի է, որ տեղի ունեցածի վերաբերյալ ՈՒԵՖԱ-ն քննություն է սկսելու, և, ամենայն հավանականությամբ, բելառուսական թիմերի նկատմամբ խիստ պատժամիջոցներ կկիրառվեն: Բնականաբար, կպատժվեն նաև ֆուտբոլիստները, որոնց անմիջական մասնակցությամբ է տեղի ունեցել ֆուտբոլային խոշոր խարդախությունը:
Բելառուսի ֆուտբոլի բարձրագույն խմբի առաջնությանը մասնակցում են 16 թիմեր: Այս երկրի առաջին լիգայի առաջնության մասնակիցների թիվն է 14: Բացի այս, կա նա բարձրագույն խմբի փոխարինողների, այսպես ասած՝ դուբլի առաջնություն:
Դեռևս 2016 թվականի օգոստոսին Բելառուսի Քննչական կոմիտեն մեղադրանք էր առաջադրել 1985 թվականի ծնված Ուկրաինայի քաղաքացու նկատմամբ, ով խոշոր չափի գումար էր տրամադրել առաջին դիվիզիոնում հանդես եկող ֆուտբոլիստներին հանդիպման ելքի վրա ազդելու համար: Բացի այս, քրեական գործ էր հարուցվել ուկրաինացի նախկին բասկետբոլիստ Յարոսլավ Լեմիկի նկատմամբ: Նրա անմիջական միջնորդությամբ Բելառուսի առաջին դիվիզիոնի «Օմյաշի»-«Լուչ» հանդիպումը ավարտվել էր 3:3 հաշվով:
Միջազգային բուքմեյքերական կազմակերպություններում այս խաղի ընթացքում կատարվել են խոշոր չափի խաղադրույքներ: Իրավապահ մարմինների հավաստմամբ՝ Լեմիկը, ով հանդես է եկել բելառուսական «Գրոդնո-93» թիմում, սպորտային խարդախությամբ զբաղվող միջազգային հանցախմբի անդամ է: Մինսկի «Լուչ» ակումբի ողջ ղեկավարությունն էլ սերտորեն համագործակցել է հանցախմբի հետ՝ վաստակելով խոշոր գումարներ:
