Օրեր առաջ հայտնի դարձավ, որ հայ-թուրքական սահմանը խախտելու պատճառով սպանվել է 35-ամյա թուրք հովիվ Մուստաֆա Ուլքերը, որը, ԶԼՄ֊ների փոխանցմամբ, սահմանը հատել էր մոլորված անասունին գտնելու համար:
ՀՀ ՊՆ խոսնակ Արծրուն Հովհաննիսյանը մեզ հետ զրույցում պարզաբանել էր, որ ՀՀ ԶՈՒ-ն այդ հատվածում զինծառայողներ չունի, այդտեղ պատասխանատու են ռուս սահմանապահներն ու ՀՀ Ազգային անվտանգության ծառայությունը:
Թե որքանո՞վ էր ռուս սահմանապահների գործողությունը ադեկվատ, և առհասարակ, որքանո՞վ սահմանում տեղի ունեցող միջադեպերին ռուսներն ունեն պատասխանատվության բաժին՝ «Առաջին լրատվական»֊ը հետաքրքվեց Ազգային անվտանգության նախկին փոխնախարար Գուրգեն Եղիազարյանից:
Նրա կարծիքով՝ միջադեպն անկասկած հրահրվել էր թուրքերի կողմից, և սահմանապահների պատասխանն էլ ադեկվատ էր․«Սա առաջին սադրանքը չէ, որ հրահրվում է թուրքերի կողմից, բայց այս մեկը ողբերգական ավարտ ունեցավ: Թուրքերը մշտապես սադրանքերի են գնում, այս անգամ էլ զինված հովիվը սահման է հատել, և նման դեպքում ադեկվատ է եղել պատասխանը»:
Գուրգեն Եղիազարյանի պնդմամբ՝ ոչ միան ռուս սահմանապահները, այլ նաև Հայաստանի Հանրապետության զինվորն է պատախասնատու սահմանի համար: Նրա խոսքով՝ պատասխանատվության բաժինը՝ 50-50 է․ «Եթե հարցնեք՝ ինչ է եղել, կասեմ, որ, միանշանակ, համարժեք է եղել սահմանի խախտմանը: Զինված խախտումը, բնական է, պետք է նման ելք ունենար: Այս մեկը, կրկնում եմ, ողբերգական ավարտ ունեցավ:
Մեր այն դիտարկմանը, որ եթե սահման հատողը պարզապես հովիվ է, որն իր մոլորված անասունին է փնտրել, ապա պատասխանը ադեկվա՞տ էր, Գուրգեն Եղիազարյանը պատասխանեց․ «Ամեն օր Աֆղանստանում հարյուրավոր զոհեր են լինում՝ խաղաղ բնակչությունից, ամերիկացիները, տիրապետելով լավագույն տեխնիկային, չեն կարողանում կողմնորոշվել՝ ահաբեկի՞չ է իրենց մոտենում, թե՞ խաղաղ քաղաքացի. Այսինքն՝ եթե հարյուրավոր մարդիկ են զոհվում, և նրանց մասին խոսակցություն չկա, մեկ զինված հովվի հետ կապված, իհարկե ողբերգական դեպքը, պետք չէ սարքել շատ լուրջ խնդիր: Թուրքիան է հրահրել զինված հովվի մուտքը մեր սահման, Ձեր կարծիքով՝ առանց հատուկ ծառայության հրահրմա՞ն է եղել դա: Նա պետք է որ ադրբեջանցի լիներ ազգությամբ, բայց նա հո ինքն իրեն չէ՞ր վերցնի ու սահման հատի»,- եզրափակեց նա:
Լուսանկարը՝ PanARMENIAN Photo-ի
